Ibi ni byo bitero bya mbere bikomeye Amerika ikoze ku mugabane wa Amerika y'Epfo kuva nyuma y'intambara y'ubutita mu myaka ya za 1990. Byatumye abaturage b'iki gihugu bashya ubwoba, ndetse bigitangira Perezida Nicolás Maduro yamaganye "ubushotoranyi bwa gisirikare" bwa Amerika kandi atangaza ibihe bidasanzwe mu gihugu.
Amashusho yerekanye umwotsi mwinshi uzamuka mu bice bitandukanye by'umurwa mukuru Caracas. Ibi bibaye nyuma y'uko ibihugu byombi bimaze iminsi bishyamiranye, ahanini kubera ibirego Washington ishinja Caracas byo gushyigikira ubucuruzi bw'ibiyobyabwenge biva muri Venezuela bijya muri Amerika.
Perezida Trump yavuze ko Amerika yagabye "ibitero bikomeye kuri Venezuela kandi yafashe umutegetsi wayo, Perezida Nicolàs Maduro" n'umugore we. Ibi yabitangaje ku rubuga rwe Truth Social anemeza ko nyuma yo gufatwa Maduro yahise "avanwa mu gihugu" n'indege.
Trump yongeraho ko ibi bikorwa byakozwe bigendanye no kubahiriza amategeko ya Amerika, yongeraho ko baza gutanga amakuru arambuye mu kiganiro n'abanyamakuru ku rugo rwe Mar-a-Lago muri leta ya Florida.
Amerika, yari yarashyizeho miliyoni 50 z'amadorari nk'igihembo cy'uwafasha mu guta muri yombi Perezida Maduro.