Aya masezerano yakiriwe neza ku masoko mpuzamahanga, cyane cyane kubera icyizere cy'uko ibiciro bya peteroli bishobora kugabanuka nyuma y'uko iyi nzira inyuramo hafi 20% bya peteroli yoherezwa ku Isi yose yongeye gufungurwa. Ariko kandi, ari no gutuma Trump ahura n'igitutu gikomeye cya politiki imbere mu gihugu cye.
Bamwe mu bagize Ishyaka ry'Abarepubulikani bashyigikiye intambara banenze aya masezerano, bavuga ko Trump yemeye kugirana ubwumvikane na Iran atageze ku ntego yari yarashyize imbere.
Umunyapolitiki Lindsey Graham, usanzwe ari inshuti ya Trump, yagaragaje impungenge ku buryo Amerika na Iran bisobanura mu buryo butandukanye ibyumvikanyweho.
Ku rundi ruhande, Visi Perezida wa Amerika, JD Vance, yagerageje guhosha impaka, avuga ko Iran itazahita ihabwa umutungo wayo wafunzwe, keretse yujuje ibyo yasabwe bijyanye na gahunda yayo ya nikereyeri.
Nubwo amasezerano ashobora kugabanya umwuka mubi warangwaga mu Burasirazuba bwo Hagati, abasesenguzi bavuga ko inyungu za Trump muri politiki zishobora kutaboneka vuba. Ibi biterwa n'uko ibiciro bya lisansi muri Amerika bikiri hejuru, ndetse no kuba bishobora gufata ibyumweru cyangwa amezi mbere y'uko ubucuruzi bwa peteroli busubira ku murongo wabwo.
Hari kandi impungenge ko aya masezerano ashobora kutamara igihe kirekire. Amerika na Iran zifite iminsi 60 yo kugera ku masezerano arambuye ku bibazo birimo gahunda ya Iran yo gutunganya ubutare bwa uranium n'ibihano byafatiwe Tehran. Kutabyumvikanaho bishobora kongera kubura imirwano.
Iyi gahunda kandi iri kugereranywa n'amasezerano yo mu 2015 azwi nka JCPOA, yasinywe ku butegetsi bwa Barack Obama, Trump yakunze kunenga avuga ko yahaye Iran amahirwe menshi. Kuri ubu, bamwe mu batavuga rumwe na we bavuga ko na we ashobora kuba ageze aho yemera ibyo yigeze kwamagana.
Mu gihe aya masezerano ashobora gufatwa nk'intambwe iganisha ku mahoro, abasesenguzi bagaragaza ko ari ikizamini gikomeye kuri Trump. Naramuka ayagejeje ku musozo mwiza, ashobora kumwongerera icyizere muri politiki. Ariko naramuka asenyutse, ashobora kumushinja kuba yarahagaritse intambara atabanje gukemura ibibazo by'ingenzi byayiteye.