Ku wa 07 Werurwe 2026, muri Olympic Hotel i Kigali, hazabera umuhango wo gutanga ibihembo mpuzamahanga bya Shining Stars Africa Awards, igikorwa gihuza ibyamamare n’abayobozi mu ngeri zitandukanye zirimo imiyoborere, ubuhanzi, siporo, ubucuruzi n’ikoranabuhanga.
Mu bahanzi bazasusurutsa abazitabira uyu muhango harimo TopCheri, uri mu bakunzwe cyane muri Namibia. TopCheri umaze imyaka irenga 6 mu muziki, akunzwe mu ndirimbo zitandukanye zirimo "Calling Heaven", "Omapendafule", "Koko" na "Ethanje" yakoranye na Manxebe.
Mbere yo gufata urugendo rugana i Kigali, TopCheri yabanje kwakirwa na Minisitiri w’Intebe wa Namibia, Tjitunga Elijah Ngurare, bagirana ibiganiro byibanze ku kamaro k’ibi bihembo no ku mahirwe abahanzi bafite mu guteza imbere isura y’ibihugu byabo.
Mu biganiro byabo, bagarutse ku buryo ibirori nka Shining Stars Africa Awards bifasha mu guhuza Afurika, guteza imbere impano z’abahanzi no kongera ubukerarugendo hagati y’ibihugu.
Hanaganiriwe ku buryo Namibia yakomeza kubaka izina rishingiye ku muco n’ubuhanzi, binyuze mu gushyigikira abahanzi bayo no kubaha amahirwe yo kwigaragaza ku rwego mpuzamahanga.
TopCheri agaragara nk’umwe mu bahanzikazi bagejeje umuziki wa Namibia ku rwego mpuzamahanga, bityo uruhare rwe muri ibi bihembo rukaba rufite igisobanuro gikomeye ku gihugu cye.
Monica Pineas yavukiye i Walvis Bay muri Namibia ku wa 01 Kanama 1991, ari na ho yakuriye. Yize muri Kaminuza ya Windhoek, ariko ntiyasoje amasomo ye kubera urupfu rwa mukuru we wamufashaga mu mibereho.
Nyuma y’icyo gihe kigoye, yahisemo gukurikira impano ye mu muziki. Igitaramo cye cya mbere yagikoreye mu Budage, atangira urugendo rwamaze imyaka isaga 12 ari mu muziki.
Muri iyo myaka, TopCheri yagiye yegukana ibihembo bitandukanye birimo ibya SANLAM na MTC, aba umwe mu bahanzikazi bafite izina rikomeye muri Namibia no mu karere.
Yasohoye album nyinshi zigaragaza imikurire ye mu buhanzi, zirimo: The Matrimony (2019), Tithe (2020), Ghetto Love (2021), Dual (2021), Fertile (2022), Mother (2023) ndetse na I Am Monika (2025). Izi album zatumye arushaho kumenyekana no kubaka umwihariko mu njyana ze.
Uretse TopCheri utegerejwe i Kigali, Shining Stars Africa Awards izataramiramo abandi bahanzi barimo Prince Luv (Zambia), Bossgia (Tanzania), Shana Sierra (Uganda), Zyrah (Tanzania), Noela (Uganda), Pheno Boy (DRC) na TChamps (Nigeria).
Hazabaho kandi ibiganiro bigufi ku ngingo zitandukanye zirimo ubuhanzi, imiyoborere, ubucuruzi, ikoranabuhanga na siporo. Mu bazatanga ibiganiro harimo: Massamba Intore, umunyabigwi mu muziki nyarwanda; Mukazibera Marie Agnès, wabaye umudepite imyaka igera kuri 15; na Mugabo Julius, umwe mu rubyiruko ruri kwigaragaza mu bucuruzi bwo ku mbuga nkoranyambaga
Hazaba kandi umwanya wo kumurika imideli, aho abanyamideli b’ikigo cya RIFI bazerekana imyambaro itandukanye. Mu bazamurika imyambaro yabo harimo Kulwa Mkwandule (Tanzania), Nunu (Rwanda), Hilda Baleni (Zambia) na Mariro Umubyeyi Angèlique (Rwanda).
Amatora aracyakomeje binyuze ku mbuga ssaward.com na festivoz.com, aho abahatana baturuka mu bihugu bisaga 40 birimo ibyo muri Afurika ndetse no hanze yayo nka Haiti, USA na Trinidad & Tobago.
Ibi bihembo bitegerejwe nk’ihuriro rikomeye rizafasha mu gukomeza guhuza impano za Afurika, kongera ubufatanye no guteza imbere ubuhanzi nk’inkingi y’iterambere rirambye ku mugabane. TopCheri, nk’umwe mu bazatarama, azaba ahagarariye Namibia muri iki gikorwa gikomeye kizabera i Kigali.
Mu bahataniye ibihembo bya Shining Stars Africa Awards 2026 bo mu Rwanda harimo Mutesi Jolly wabaye Miss Rwanda 2016, Massamba Intore, Element, Alicia & Germaine, Bruce Melodie, Kigali Protocal, Jojo, Nadia Nany, Rocky Kimomo, Passy Sweet, Bianca Baby, MC Tino n’abandi.
Muri Afurika y’Iburasirazuba harimo Juma Jux, Priscy, Mbosso, Paula Kajala, Tanasha Donna, Jasinta Makwabe, Meena Ally, Zamaradi Mketema, Shali Ahmed, Bukuru Adnette, Niyubahwe Kelly n’abandi.
Ni ibihembo bihatanyemo kandi abo mu bindi bihugu bya Afurika no hanze yayo harimo Fally Ipupa, Uche Montana, Lady Lava, Tianna, C4 Pedro na Veronica Adane. Abahatanye muri rusange baturuka mu bihugu bigera kuri 40 byiganjemo iby’Afurika no hanze yayo, mubyo hanze y’umugabane wa Africa harimo Haiti, USA, Trinidad&Tobago.
Umuhanzikazi Monica Pineas [TopCheri] uri mu bahagaze neza mu muziki wa Namibia yahuye na Minisitiri w'Intebe
TopCheri ategerejwe mu Rwanda mu birori mpuzamahanga bya Shining Stars Africa Awards
TopCheri amaze imyaka 6 mu muziki
TopCheri yamamaye mu ndirimbo "Calling Heaven" yarebwe n'abarenga Miliyoni 2 kuri Youtube
REBA INDIRIMBO "CALLING HEAVEN" YA TOPCHERI UTEGEREJWE MU RWANDA