Ku munsi w’isabukuru ye, Tonzi yifashishije imbuga nkoranyambaga ashimira Imana ku bw’ubuzima yamuhaye ndetse n’uburinzi bwayo avuga ko abubona buri segonda, buri munota na buri munsi.
Mu butumwa yanyujije kuri Instagram, yagize ati: “Kubaho ni Wowe Mana. Ndagushima ku mpano y’ubuzima, uburinzi bwawe ndabubona buri segonda, buri munota, buri munsi. Ineza yawe ntirondoreka, urukundo unkunda rumbeshejeho. Akira iyi ndirimbo ngutuye, Wowe byose byanjye. Zaburi 23:1.”
Nyuma y’akanya gato, Tonzi yahise ashyira hanze indirimbo “Kubaho ni Yesu”, avuga ko ari indirimbo yatuye Imana mu rwego rwo kuyishimira ku bw’impano y’ubuzima. Yongeyeho ubutumwa bugira buti: “Kubaho ni Yesu, kubaho ni We, ni We, ni We. Kubaho ni We.”
“Kubaho ni Yesu” yakozwe muri Umucyo Production Studio ya Radio Umucyo, amajwi yayo akorwa na Producer Camarade Holy, usanzwe akorana na Tonzi mu bikorwa bye by’ubuhanzi n’ivugabutumwa. Amashusho yayo yakozwe na Eliel Sando.
Camarade Holy unashinzwe ibikorwa by'ivugabutumwa bya Tonzi, yabwiye inyaRwanda ko ari mu myiteguro ya album ye nshya azamurika muri uyu mwaka wa 2026. Ati: "'Kubaho ni Yesu' ni indirimbo y’umuramyi Tonzi yakoze by'umwihariko yizihiza isabukuru ye y’amavuko ashimira Imana ko iyo itaba yo atakagejeje iyi myaka."
Yavuze kandi ko muri iyi minsi Uwitonze Clementine uzwi nka Tonzi ahugiye mu gukora Album ye nshya "azamurika vuba aha muri uyu mwaka yibanda cyane mu kwandika indirimbo zivuga urukundo rw’Imana n’imbaga zayo".
Tonzi yizihije isabukuru y’amavuko asohora indirimbo nshya yise “Kubaho ni Yesu”
REBA INDIRIMBO NSHYA "KUBAHO NI YESU" YA TONZI