Tiwa Savage yahishuye uburyo Don Jazzy yamufashaga guhangana n’agahinda

Mu kiganiro yagiranye na Joey Akan muri podcast yitwa Afrobeats Intelligence, Tiwa Savage yavuze ko atigeze amenya neza agaciro ka ‘record label’ kugeza igihe aviriye muri Mavin Records.

Uyu muhanzikazi yavuze ko igihe yari muri Mavin Records yabonaga abantu bamuba hafi mu bihe bigoye, cyane cyane iyo habaga hari inkuru cyangwa impaka zimuvugwaho ku mbuga nkoranyambaga.

Yagize ati: “Kumenya aho usinyiye ni ingenzi cyane. Ibyo sinabimenye neza kugeza mvuye muri Mavin. Iyo habaga hari ikibazo cyangwa abantu banyibasira ku mbuga nkoranyambaga, nahitaga njya mu cyumba cya Don Jazzy, nkicarana n’abandi bahanzi bo muri Mavin tukabiganiraho. Nararaga aho nkahirirwa, nkarira niba bibaye ngombwa, hanyuma tukabivamo.”

Tiwa Savage yavuze ko nyuma yo kwerekeza muri label mpuzamahanga ibintu byahindutse kuko atakibona uwo mwanya wo kuganirizwa cyangwa kwegerwa nk’umuryango.

Ati: “Iyo uri muri label zo hanze, ntabwo bita cyane ku buzima bwawe bwite. Sinajya ku biro bya Empire Distribution ngo ntangire kurira. Icyo gice ndagikumbura cyane.”

Uyu muririmbyikazi yasobanuye ko abahanzi bakwiye kwitondera cyane inzu basinyamo amasezerano, bakabanza kureba niba ibitayeho ari ukubitaho nk’abantu cyangwa niba babafata nk’imashini zo gushaka amafaranga gusa.

Tiwa Savage yinjiye muri Mavin Records mu 2012, aza kuyivamo mu 2019 mbere yo gusinyira Universal Music Group. Nubwo yamaze kuva muri Mavin, Tiwa Savage yavuze ko akiyifata nk’umuryango we ndetse ko umubano we n’abayikoramo utigeze uhinduka.

Tiwa Savage yatangaje ko abahanzi bakwiye kwitondera amasezerano basinya, avuga ko Marvin Records yamubaye hafi igihe kinini ndetse imuhoza amarira