Mu rwego rwo gukomeza ibikorwa byo kuzirikana amateka ya Amerika, Perezida Donald Trump yagejejweho igishushanyo kinini cy'umuringa cyerekana Thomas Jefferson, Perezida wa gatatu wa Leta Zunze Ubumwe za Amerika ndetse n'umwanditsi mukuru w'itangazo ryatangaje ubwigenge bw'icyo gihugu.
Iki gishushanyo cyakozwe n'umunyabugeni George Lundeen, wanakoze igishushanyo cya Trump kiri ku kibuga cye cya Golf giherereye i West Palm Beach muri Leta ya Florida. Amakuru avuga ko iki gishushanyo cyagejejwe muri White House ku wa Mbere kugira ngo kibanze gikorerwe igenzura ry'umutekano mbere yo kugishyira aho cyateganyijwe.
Umukinnyi wa filime Steven C. Barber, wagize uruhare mu gutuma iki gishushanyo gitangwa nk'impano, yavuze ko Trump yifuza ko gishyirwa muri Rose Garden, aho yamaze gushyira igishushanyo cya George Washington ndetse n'ibindi bimenyetso bigize ibyo yise "Walk of Fame", ahashyirwa ibintu byibutsa amateka y'abayoboye Amerika.
Nubwo White House itaremeje ku mugaragaro aho iki gishushanyo kizashyirwa, nta muhango wo kugitangiza wari uteganyijwe mu mpera z'icyumweru cyo kwizihiza umunsi w'ubwigenge wa Amerika, wizihizwa ku wa 4 Nyakanga.
Iki gishushanyo cyerekana Thomas Jefferson yicaye ku ntebe yubakishijwe amabuye, ari kwandika ku meza yihimbiye ubwe. Cyamugaragaje ari gukora ku nyandiko y'itangazo ry'ubwigenge, nyuma ryaje gukosorwa na John Adams na Benjamin Franklin mbere yo kwemezwa n'Inteko Nkuru y'Abakoloni.
Steven C. Barber yavuze ko iki gishushanyo gifite agaciro kagera ku madolari ya Amerika ibihumbi 150, kandi ko George Lundeen ari umwe mu banyabugeni beza Amerika ifite.
Iki gishushanyo cyabanje gukorwa hashize imyaka 25, aho kopi yacyo ya mbere yashyizwe ku rukiko rwa Jefferson County Courthouse muri Monticello, muri Florida, ikaba yarafunguwe ku mugaragaro na Guverineri Ron DeSantis umwaka ushize.