Iyi ndirimbo igaruka ku buzima bw’umubyeyi wahisemo guhisha umwana we mu gihuru mu gihe bahigwaga, agamije kumurinda urupfu. Mbere y’uko batandukana, uwo mubyeyi yasize abwiye umwana amagambo yuzuye urukundo n’icyizere. Yamubwiye ko nubwo abari kubashaka buzuye umwijima, we agomba kuzaba umucyo.
Yamusabye kuzabana n’abantu bose nta kurobanura, gukunda buri wese no kuzabera u Rwanda urumuri. Ayo magambo ni yo yabaye umurage ukomeye w’uwo mwana, amufasha gukura afite icyerekezo cyo kubaho agirira abandi akamaro.
Iyi ndirimbo "Rumuri" igiye hanze mu gihe u Rwanda ruri mu minsi 100 yo Kwibuka ku nshuro ya 32 Jenoside yakorewe Abatutsi mu 1994, yahitanye inzirakarengane zirenga miliyoni mu minsi ijana.
Ku wa 1 Gicurasi 2026, The Way of Hope Choir bitabiriye igikorwa cyo Kwibuka ku nshuro ya 32 Jenoside yakorewe Abatutsi. Ni igikorwa cyabereye ku rwibutso rwa Jenoside rwa Nyanza ya Kicukiro. Muri icyo gikorwa.
Aba baririmbyi bari mu bakunzwe cyane mu Itorero ry'Abadivantiste b'Umunsi wa Karindwi, basabwe kumenya neza amateka y’igihugu cyabo no gusobanukirwa imvo n’imvano y’amateka ashaririye u Rwanda rwanyuzemo.
Umuyobozi wa Remera SDA Church, Pastor Rurangirwa Alfonse, yashimangiye ko kwibuka ari ingenzi cyane cyane ku rubyiruko, kuko bibafasha gusobanukirwa amateka no kumenya aho igihugu cyavuye n’aho kigana.
Yagaragaje ko urubyiruko rwitabira ibikorwa byo kwibuka rubona amahirwe yo kwiga amateka nyayo no gukomeza urugendo rwo kubaka ubumwe n’ubwiyunge.
Yagize ati: "Urubyiruko, cyane cyane abari bato Jenoside iba cyangwa abavutse nyuma yayo, bagomba gusobanukirwa amateka y’igihugu cyabo kuko ari bwo buryo bwo kwirinda ko ibyabaye byazongera kubaho".
The Way of Hope Choir isanzwe izwi mu ndirimbo zitandukanye zirimo “Agafu”, “Nimuhumure” na “Ururembo”, ikaba ifite intego yo kugarurira abantu Yesu Kristo no guhumuriza abafite ibikomere binyuze mu bihangano byabo.
Indirimbo yabo nshya “Rumuri” na yo ije ishimangira uwo murongo, igahumuriza kandi ikibutsa abantu ko no mu bihe by’umwijima, hari icyizere cyo kuba urumuri ku bandi no ku gihugu muri rusange.
The Way of Hope yasohoye indirimbo “Rumuri” ishingiye ku nkuru y’umwana warokotse Jenoside yakorewe Abatutsi
REBA INDIRIMBO NSHYA Y'IHUMURE "RUMURI" YA THE WAY OF HOPE CHOIR