The Ben yabigarutseho agaragaza ko Diamond Platnumz atari
umuhanzi usanzwe, ahubwo ko ari umuntu ufite byinshi abandi bahanzi
bakwigiraho, haba mu guhanga ibihangano, kubaka izina, gushaka amasoko mashya
no gucunga umwuga w'umuziki.
Yagize ati: “Sinzi niba ajya ashimwa nk'uko bikwiye [Diamond
Platnumz], kuko ni nk'igitabo kuri twe nk'abahanzi. Ni igitabo njye nsoma buri
munsi ngo ambere icyitegererezo.”
The Ben ni umwe mu bahanzi bafite izina rikomeye mu muziki
nyarwanda. Yatangiye kumenyekana mu 2008, ubwo yatangiraga gushyira hanze
indirimbo zamufashije kwigarurira imitima y'abakunzi ba muzika.
Mu myaka ya mbere y'urugendo rwe, yagaragaje impano
idasanzwe mu njyana ya R&B, bituma aba umwe mu bahanzi bahagaze neza mu
bihembo bya Salax Awards. Mu bihe bitandukanye, yegukanye ibihembo birimo
Umuhanzi mwiza wa Afro R&B n'iby'Indirimbo nziza y'umwaka.
Mu 2009, yashyize hanze Album ye ya mbere yise Amahirwe ya
Nyuma, ikurikirwa na Ko Nahindutse yamurikiye mu Bubiligi mu 2016.
Mu 2010, The Ben yagiye muri Leta Zunze Ubumwe za Amerika
aho yakomeje ibikorwa by'umuziki, anakorana n'abandi bahanzi. Mu 2016, yabaye
umwe mu bahanzi bageze mu cyiciro cya nyuma cy'ibihembo bya RFI Discovery
Prize, byari ikimenyetso cy'uko umuziki we wari watangiye kurenga imbibi z'u
Rwanda.
Nyuma yo gukomeza gukora umuziki no kwagura izina rye,
yagarutse mu Rwanda mu buryo burambye, akomeza gukora ibitaramo n'ibihangano
bishya.
Ku wa 1 Mutarama 2025, yakoze igitaramo gikomeye muri BK
Arena, anashyira hanze Album ye ya gatatu yise Plenty Love. Iki gitaramo cyari
kimwe mu byaranze urugendo rwe, nyuma y'igihe abafana be bari bamaze bategereje
Album nshya.
Mu kiganiro yagiranye n'itangazamakuru mu 2026, yatangaje ko
yari afite gahunda yo gukomeza gusohora ibihangano bishya, harimo n'indi Album
cyangwa EP, agaragaza ko yifuza gukomeza kuzamura urwego rw'umuziki we.
Diamond Platnumz ni umwe mu bahanzi bakomeye muri Afurika.
Yavukiye i Tandale, mu mujyi wa Dar es Salaam muri Tanzania, ku wa 2 Ukwakira
1989.
Urugendo rwe rw'umuziki rwatangiye mu buryo butari
bworoshye. Mu kiganiro yagiranye na GRAMMY.com mu 2020, yavuze ko yakuriye mu
buzima butari bworoshye, ndetse ko hari igihe nyina yamuhaye impeta ya zahabu
akayigurisha kugira ngo abone amafaranga yo kwishyura igihe cyo gukorera muri
studio.
Yatangiye gukurikirana umuziki mu buryo bufatika mu 2006,
ariko intambwe ikomeye yayiteye mu 2009 ubwo indirimbo ze zatangiraga
kumenyekana. Mu 2010, indirimbo Kamwambie yamuhesheje kwamamara cyane,
inamufasha kwinjira mu bahanzi bari bafite izina rikomeye muri Tanzania.
Nyuma y'iyo ndirimbo, yakomeje gushyira hanze ibihangano
byakunzwe birimo Mbagala, Number One, Nana, Marry You, Jeje, Waah n'izindi.
Yagiye akorana n'abahanzi bakomeye ku rwego mpuzamahanga
barimo Davido, P-Square, Ne-Yo, Rick Ross, Omarion, Tiwa Savage na Alicia Keys,
ibyo bikamufasha kwagura umuziki we ukagera ku bantu benshi hirya no hino ku
Isi.
Mu 2014, yabaye umuhanzi wa mbere wo muri Tanzania wegukanye
ibihembo birindwi muri Tanzania Music Awards mu mateka y'ibyo bihembo, ndetse
anatoranywa mu bihembo bya BET mu cyiciro cy'abahanzi beza bo muri Afurika.
Icyakora, Diamond Platnumz ntiyagarukiye ku kuririmba gusa.
Yashinze inzu ifasha abahanzi mu bikorwa by'umuziki ya WCB Wasafi, anagura
ibikorwa bye mu itangazamakuru binyuze kuri Wasafi FM na Wasafi TV.
Mu bahanzi banyuze muri WCB Wasafi harimo Harmonize,
Rayvanny, Mbosso, Lava Lava na Zuchu. Ibi byatumye Diamond atangira no
kumenyekana nk'umwe mu bantu bagira uruhare mu guteza imbere impano nshya no
kubaka uruganda rw'umuziki muri Tanzania.
Yanakomeje kwagura ibikorwa bye ku rwego mpuzamahanga, aho
mu 2018 yashyize hanze Album A Boy From Tandale, yari iriho indirimbo yakoranye
n'abahanzi batandukanye b'ibyamamare.
Nubwo The Ben avuga ko Diamond Platnumz ari icyitegererezo
afatiraho urugero, aba bahanzi bombi si abantu batari baziranye mu bikorwa
by'umuziki.
Mu 2021, bahuriye mu ndirimbo bise Why, yahuje ijwi rya The
Ben n'uburambe bwa Diamond Platnumz mu njyana ya Bongo Flava na Afropop.
Iyi ndirimbo yabaye imwe mu bihangano by'ingenzi mu rugendo
rwa The Ben, cyane ko yamuhuje n'umwe mu bahanzi bafite izina rikomeye mu
Karere ka Afurika y'Iburasirazuba.
Mu 2023, aba bahanzi bongeye kugaragara bahuriye ku
rubyiniro baririmbana iyi ndirimbo mu birori byo gutanga ibihembo bya Trace
Awards byabereye muri BK Arena i Kigali.
Kuba The Ben avuga ko afata Diamond Platnumz nk'igitabo
ahora asoma, bigaragaza ko nubwo na we amaze imyaka myinshi yubaka izina mu
muziki, agifite inyota yo kwiga ku bandi no kurushaho gutera imbere.
Ni urugero kandi rugaragaza ko mu ruganda rw'umuziki, kugira
izina rikomeye bitavuze ko umuntu aba yarangije kwiga, ahubwo ko gukomeza
kwitegereza abandi, kwagura ubumenyi no guhanga udushya ari bimwe mu bishobora
gufasha umuhanzi kuguma ku rwego rwo hejuru.
