Ubwo
yaririmbaga mu Karere ka Musanze mu bitaramo bya Summer Country Tour, The Ben
yishimiye uko yakiriwe ku rubyiniro cyane ko abanya-Musanze bamweretse urukundo
rwinshi cyane.
Ubwo
yari ku rubyiniro ageze ku ndirimbo ya “Fine girl” The Ben yikuyemo isaha ye yo
mu bwoko bwa Omega Speedmaster Moonwatch ayinaga mu bafana be hanyuma umwe muri
bo ahita ayegukana. Iyi saha igura $7,800 angana na 11,459,549 Frw
Uretse
iyi saha, The Ben yaje kongera kunaga mu bafana be aka-esume yihanaguzaga nako
barakarwanira kegukanwa n’undi mufana umwe wari waje kumushyigikira.
Iyo
urebye muri ibyo byose The Ben yahaye abafana be ubwo yari ku rubyiniro, The
Ben yatanze arenga miliyoni 11 z’amafaranga y’u Rwanda by'umwihariko akaba ariyo
mafaranga agura iyo saha.
Iyi
saha ifite umwihariko wo kuba ariyo saha ya mbere yambawe ku kwezi. Dore amwe
mu mateka yayo.
Isaha
ya Omega Speedmaster Moonwatch ifite amateka akomeye cyane mu isi y’amasaha,
aho yatangiye mu 1957 ikaba yaratangiye igenewe abasiganwa mu marushanwa
y’imodoka (motorsports) ngo ibafashe gupima umuvuduko.
Yari
ifite ikoranabuhanga rya “tachymeter bezel” ryoroherezaga abashoferi kumenya
umuvuduko bakoresheje igihe n’intera. Nubwo yari igenewe ibikorwa byo ku
butaka, uburyo yakoranywe ubuhanga n’ubuziranenge, byatumye itangira
kumenyekana cyane mu bakunzi b’amasaha ku Isi.
Mu 1965, ikigo cya NASA cyashatse isaha ishobora kwifashishwa n’abasirikare b’ikirere (astronauts), kiyigerageza hamwe n’izindi zo mu nganda zitandukanye.
Nyuma y’ibizamini bikomeye cyane birimo ubushyuhe bukabije, ubukonje,
ihindagurika ry’umuvuduko n’ibindi, Omega Speedmaster ni yo yonyine yashoboye
kubitsinda byose. Ibi byatumye yemererwa gukoreshwa mu bikorwa bya NASA, iba
isaha yizewe ku rwego rwo hejuru mu ngendo zo mu kirere.
Izina
“Moonwatch” ryayigize icyamamare cyane ryaje mu 1969, ubwo mu rugendo rwa
Apollo 11, umunyamerika Buzz Aldrin yayambaye igihe yageraga ku kwezi, iba
isaha ya mbere yambariwe ku kwezi mu mateka y’isi.
Nyuma
yaho mu 1970, ubwo icyogajuru cya Apollo 13 cyagiraga ikibazo gikomeye
cyashoboraga gutuma abasirikare bapfa, iyi saha yongeye kwigaragaza nk’ingenzi
kuko yabafashije kubara igihe nyacyo cyabafashije kugaruka ku isi amahoro.
Kuva icyo gihe, Omega Speedmaster Moonwatch yabaye ikimenyetso cy’ubuhanga, ukwizerwa n’amateka akomeye adasanzwe mu isi y’amasaha, ihindurirwa n’amazina ihita yitwa Moonwatch.
The Ben yaje ku rubyiniro yambaye isaha ya Omega Speedmaster Moonwatch
Byagezemo hagati isaha The Ben yari yambaye ayiha abafana be
Mu rugendo rwa Apollo 11, umunyamerika Buzz Aldrin yambaye iyi saha mu gihe yageraga ku kwezi bituma iza no kurokora ubuzima bwabo ubwo bavaga ku kwezi
Reba video y'uburyo abafana barwaniye isaha ya miliyoni 11 The Ben yari yambaye