Iki gikorwa cyabaye mu ijoro ryo ku wa Kane tariki ya
18 Ukuboza 2025, kibera muri Crown Conference mu Mujyi wa Kigali. Ni ubwa mbere
The Ben akoze indirimbo afatanyije na Gisubizo Ministries mu rugendo rwe
rw’umuziki wagutse.
The Ben, witegura gusohora amashusho y’indirimbo ye nshya
“Indabyo Zanjye”, akunze kugaragaza ko mu myaka iri imbere ateganya kwinjira
byimbitse mu muziki wa Gospel, akoresheje impano ye mu kuramya no guhimbaza
Imana.
Gisubizo Ministries yari yatumiye The Ben mu gikorwa cya “Live
Recording”, cyari kigamije gufata amashusho y’indirimbo zirindwi zigize Album
yabo ya gatandatu mu ruhererekane bise “Worship Legacy –Season 6.”
InyaRwanda yamenye ko indirimbo The Ben yakoranye n’iri
tsinda yitwa “Dore Yataye Ibicumuro”, ikaba iri mu ndirimbo zirindwi zigize iyi
Album.
Mu gihe cyo gufata aya mashusho, The Ben yari yaherekejwe na
Muyoboke Alex, umuraperi Khalfan Govinda, Junior Giti, n’abandi bantu
batandukanye bari baje gushyigikira iki gikorwa.
Amashusho yagiye hanze agaragaza The Ben ari ku rubyiniro
rumwe na Prince, umwe mu baririmbyi ba Gisubizo Ministries, ari na we
baririmbanye iyi ndirimbo.
Mbere yo gutangira gufata amashusho, The Ben yongeye
gushimangira ko afite icyifuzo gikomeye cyo gukorera Imana binyuze mu muziki wa
“Gospel.”
Gisubizo Ministries imaze imyaka 21 ikora umuziki, imyaka
yaranzwe n’ibikorwa bikomeye byibanze ku ivugabutumwa, ndetse no guteza imbere
impano z’abaririmbyi bayo.
Iri tsinda ryamamaye mu ndirimbo zirimo “Nguhetse ku
Mugongo,” “Amfitiye Byinshi,” “38 Irangiye,” “Uzandengere,” “Ametupa Nguvu,”
n’izindi nyinshi.
Mu rugendo rwayo, Gisubizo Ministries imaze gukora ibitaramo bikomeye bitandukanye, haba mu Rwanda no mu mahanga, bikomeje kugira uruhare rukomeye mu gukwirakwiza ubutumwa bwiza binyuze mu muziki.
The Ben na Prince basangiza imbaga indirimbo yuzuye ukwizera,
mu ifatwa ry’amashusho rya Gisubizo Ministries ryabereye i Kigali
Ku rubyiniro rumwe, amajwi abiri ahurira mu kuramya Imana, The Ben afatanya na Prince mu gikorwa cya "Worship Legacy Season 6"
Ijoro ryuzuye ubuhamya n’amasengesho, The Ben yagaragaye ku
rubyiniro mu ifatwa ry’amashusho y’indirimbo ya Gisubizo Ministries
KANDA HANO UREBE INDIRIMBO ZINYURANYE ZA GISUBIZO MINISTRIES