‘Inshallah’ ni indirimbo The Ben yashyize hanze ku wa 15
Kanama 2026, ikaba yarakiriwe neza n’abakunzi b’umuziki kuva ku munsi wa mbere
isohotse. Mu masaha 48 ya mbere, amashusho yayo amaze kurebwa n’abarenga 1.1
miliyoni kuri YouTube.
Ibi byatumye The Ben aca agahigo kari kamaze igihe gafitwe na
Meddy binyuze mu ndirimbo ye ‘My Vow’, nayo yigeze kuba iya mbere mu ndirimbo
z’abahanzi Nyarwanda ku giti cyabo (single) zagejeje ku bantu miliyoni imwe mu
minsi ibiri gusa.
Meddy yari yarashyizeho umurongo ukomeye mu bijyanye
n’umuvuduko indirimbo Nyarwanda igira mu kurebwa kuri YouTube.
Mu mwaka wa 2021, ubwo yashyiraga hanze ‘My Vow’, iyi
ndirimbo yageze ku bantu miliyoni imwe mu minsi ibiri, ibintu byari bishya mu
muziki Nyarwanda.
Uwo muvuduko wakomeje kugaragara no mu minsi yakurikiyeho.
‘My Vow’ yagejeje ku bantu barenga miliyoni ebyiri mu minsi itanu, iba imwe mu
ndirimbo z’abahanzi Nyarwanda ku giti cyabo zakiriwe cyane kuri YouTube.
Mu mpera z’Ugushyingo 2021, ‘My Vow’ yanabaye indirimbo ya
mbere y’umuhanzi Nyarwanda ku giti cye yagejeje ku bantu miliyoni 10 mu gihe
gito, ikomeza kuba igipimo cy’umuvuduko w’indirimbo Nyarwanda kuri uru rubuga.
Kugeza ubu, amashusho ya ‘My Vow’ amaze kurebwa inshuro
zirenga miliyoni 58 ku rubuga rwa YouTube rwa Meddy, bigaragaza uburemere
bw’uruhare iyi ndirimbo yagize mu rugendo rw’umuziki we.
Nyuma y’imyaka itanu Meddy ari we ufite aka gahigo, The Ben
yongeye kugaragaza imbaraga afite mu gukurura abakunzi b’umuziki, cyane cyane
kuri YouTube.
‘Inshallah’ imaze kurebwa n’abantu barenga 1,100,000 mu minsi
ibiri, bityo irenga imibare ‘My Vow’ yari yaragejejeho mu gihe kingana n’icyo.
Ibi bivuze ko The Ben atari gusa kuba yasohoye indirimbo
yakunzwe, ahubwo yanashoboye guhindura igipimo cy’umuvuduko indirimbo
y’umuhanzi Nyarwanda ku giti cye ishobora kugira mu minsi ya mbere isohotse.
Ni intambwe ikomeye cyane ku muziki Nyarwanda, kuko YouTube
imaze kuba kimwe mu bipimo by’ingenzi bigaragaza uburyo indirimbo yakiriwe
n’abakunzi b’umuziki, haba mu Rwanda ndetse no hanze yarwo.
Uretse kuba iri kuvugwa kubera imibare y’abayirebye,
‘Inshallah’ ubwayo ifite ubutumwa bushingiye ku rukundo.
Muri iyi ndirimbo, The Ben agaragaza inkuru y’umusore wuzuye
urukundo n’urukumbuzi, akabwira umukobwa ko amukunda kandi akamwizeza ko umunsi
umwe azamwambika impeta.
Ni indirimbo yubakiye ku rukundo ruzira amakimbirane, aho The
Ben agaragaza icyifuzo cyo kugirana ubuzima n’umuntu akunda no kumwizeza ko
urukundo amufitiye atari urw’igihe gito.
Ubutumwa bw’iyi ndirimbo bunahura n’imwe mu nsanganyamatsiko
zimaze kumenyereza The Ben mu muziki we, aho urukundo ruri mu byiciro
by’ingenzi by’indirimbo ze.
Ku ruhande rw’amajwi, ‘Inshallah’ yatunganyijwe na Producer
MadeBeat, umwe mu batunganya umuziki bafite izina rikomeye mu Rwanda.
Amashusho yayo yo yatunganyijwe mu buryo bw’amashusho
y’urukundo, ayoborwa na Julien Bmjizzo, afatanyije na Bright Ngabo.
Muri aya mashusho hagaragaramo ababyinnyi batandukanye ndetse
n’ibyamamare, birimo MadeBeat, bikongerera iyi ndirimbo ubuzima n’umwihariko mu
buryo igaragara.
Kuba ‘Inshallah’ yarageze kuri miliyoni imwe n’ibihumbi
birenga 100 mu minsi ibiri, ni ikimenyetso cy’uko The Ben agifite umwanya
ukomeye mu muziki Nyarwanda no mu mitima y’abakunzi bawo.
The Ben amaze imyaka myinshi ari umwe mu bahanzi
b’Abanyarwanda bafite abakunzi benshi mu Rwanda no hanze yarwo.
Uyu muvuduko mushya wa ‘Inshallah’ uje mu gihe umuziki
Nyarwanda ukomeje kwaguka, aho YouTube n’izindi mbuga z’ikoranabuhanga zimaze
kugira uruhare runini mu kumenyekanisha no gupima umusaruro w’indirimbo.
Kandi mu gihe ‘My Vow’ ya Meddy yari imaze imyaka itanu
ifatwa nk’iyashyizeho agahigo ko kugera kuri miliyoni imwe mu minsi ibiri, The
Ben ni we ubu ufite aka gahigo binyuze muri ‘Inshallah’.
Icyakora, urugendo rwa ‘Inshallah’ ruracyakomeje. Kuba imaze
kugera kuri miliyoni zirenga 1.1 mu minsi ibiri gusa bitanga ishusho y’uko
ishobora gukomeza kuzamuka mu minsi n’amezi biri imbere, ndetse ikaba ishobora
gushyiraho n’andi mateka mashya kuri YouTube.
Ku rundi ruhande, iyi ntambwe ya The Ben yongeye kuzamura ikibazo cy’irushanwa riri mu bahanzi bakomeye b’u Rwanda, cyane cyane hagati y’abamaze igihe bubaka izina n’abakomeje kugaragaza ko umuziki Nyarwanda ushobora kugera ku rwego rwo hejuru mu buryo bw’imibare ndetse no mu kwakirwa n’abawukurikira.
The Ben yakuyeho agahigo kari gafitwe na Meddy mu myaka itanu
ishize kubera indirimbo ye ‘My Vow’