The Ben n’umugore we, Clapton, Shaffy na Muyoboke berekeje i Kampala –AMAFOTO

Uyu muhanzi yahagurutse ku Kibuga cy’Indege Mpuzamahanga cya Kigali i Kanombe ku mugoroba wo kuri uyu wa Gatanu tariki 13 Gashyantare 2026, yerekeza i Kampala aho azataramira abakunzi be mu gitaramo cyiswe “Love at Mezo Noir.”

Mu bamuherekeje muri uru rugendo harimo umunyarwenya Clapton Kibonge, umujyanama mu bya muzika Muyoboke Alex ndetse na Fiacre, bose bagiye kumufasha mu bikorwa bijyanye no kumenyekanisha no gutegura neza iki gitaramo.

Mbere y’uko The Ben ajya muri Uganda, umuhanzi Shaffy nawe bazahurira muri iki gitaramo, yari ku kibuga cy’indege cya Kigali ahagana saa cyenda z’amanywa, amutegereje ngo bajyane.

Mu kiganiro yagiranye na InyaRwanda, The Ben yavuze ko yiteguye gutanga ibyishimo muri iki gitaramo yatumiwemo. Ati “Kampala ni mu rugo naho. Bitegura ibintu byiza cyane, tubazaniye umuziki mwiza w’Abanyarwanda. Ni ‘Saint Valentin’ turashaka kubibutsa gukundana.”

Iki gitaramo kizabera i Kampala ku wa 14 Gashyantare 2026, umunsi wizihirizwaho urukundo ku rwego rw’isi, kizaba ari ijoro ridasanzwe rihuza umuziki n’ibirori byateguwe mu buryo bwihariye.

Abazacyitabira baZAkurikiranira hafi umuziki wa The Ben uzaba wuzuyemo amarangamutima asanzwe aranga indirimbo ze z’urukundo.

The Ben azataramira abakunzi be mu ndirimbo ze zakunzwe zirimo iziganjemo injyana ya R&B, zamenyekanye cyane mu Rwanda no hanze yarwo, bikaba biteganyijwe ko iri joro rizasiga amateka ku bakunzi b’umuziki nyafurika batuye muri Uganda no mu bihugu bihana imbibi.

Saint Valentin: Umunsi w’urukundo wizihizwa ku isi

Saint Valentin, uzwi nka Valentine’s Day, wizihizwa buri mwaka ku wa 14 Gashyantare. Ni umunsi aho abakundana bagaragarizanya urukundo mu buryo butandukanye burimo gutanga impano, kwandikirana ubutumwa bwuje amarangamutima, no gusabana mu birori byihariye.

Uyu munsi ukomoka ku mateka ya Mutagatifu Valentin, uvugwaho kuba yararanzwe no gushyigikira abakundana mu bihe bya kera.

Uyu munsi waje kuba ikirori mpuzamahanga gihuriza hamwe abakundana n’abashaka kwishimira urukundo mu buryo bwose bushoboka.

Ku rwego rw’imyidagaduro, Saint Valentin ni umwanya udasanzwe ku bahanzi bakora indirimbo z’urukundo, aho bategura ibitaramo by’umwihariko bigamije guhuza imitima y’abakunzi babo. Ni muri urwo rwego The Ben ategerejweho ijoro ridasanzwe rizahuza urukundo n’umuziki i Kampala.

Ubwo The Ben yari ageze ku kibuga cy'indege cya Kigali i Kanombe yitegura kwerekeza mu gihugu cya Uganda, anyuze muri Kenya

The Ben yavuze ko yiteguye gufasha abakunzi be kwizihiza Umunsi wa Saint Valentin mu buryo bwihariye

The Ben avuga ko iki gitaramo kibanjirije ibindi yitegura gukorera hirya no hino mu bihugu bitandukanye byo ku Isi

The Ben agana na InyaRwanda, yvuze ko yiteguye gutanga ibyishimo ku banya-Uganda, cyane ko ari ahantu afata nko mu rugo 

Uwicyeza Pamella, umugore wa The Ben yamuherekeje mu gitaramo cyo kwizihiza Saint Valentin agiye gukorera muri Uganda

Mbere yo kugenda, Uwicyeza Pamella yabanje gusezera ku mwana wabo Luna bari kumwe ku kibuga cy'indege cya Kigali

Umukinnyi wa filime wamamaye nka Clapton Kibonge usanzwe ugaragaza ko ari umufana wa The Ben yamuherekeje mu gitaramo

Umukundwa Joshua washinze Kigali Protocol ndetse na Clapton Kibonge bari kumwe ku kibuga cy'indege mbere y'uko baherekeza The Ben i Kampala muri Uganda

Shaffy yageze ku kibuga cy'indege cya Kigali i Kanombe ahagana saa cyenda, ariko yahagurukanye na The Ben ahagana saa Moya z'ijoro

Muyoboke Alex usanzwe ari umwe mu bajyanama ba The Ben yajyanye nawe muri Uganda mu gitaramo i Kampala