Uyu mwanzuro wafashwe nyuma y’impinduka zakozwe mu mabwiriza agenga abakinnyi bemerewe gukina mu cyiciro cy’abagore, ndetse uza ukurikira imyanzuro mishya ijyanye n’uburinganire mu mikino.
Ubundi mbere, abagore bahisemo kwihinduza igitsina bari basanzwe babujijwe gukina amarushanwa yo ku rwego rw’intara, uturere ndetse n’amarushanwa ahuza amakipe atandukanye.
Icyakora, amakipe yari agifite ububasha bwo gushyiraho amabwiriza yayo ku bijyanye n’uko umuntu ashobora gukina amarushanwa y’imbere mu ikipe.
LTA yatangaje kandi ko amabwiriza mashya agomba gukurikizwa no mu marushanwa yose y’imbere mu makipe, nyuma y’amabwiriza mashya yashyizweho n’urwego rushinzwe uburenganzira bwa muntu n’uburinganire mu Bwongereza.
Ni impinduka kandi zishingiye ku cyemezo cy’Urukiko rw’Ikirenga rwo mu Bwongereza cyasobanuye ko ku rwego rw’amategeko, igitsina gifatwa nk’ikigizwe n’ibyiciro bibiri.
Ibi bibaye ndetse mu gihe Ishyirahamwe ry’Umukino wa Tennis w’Abagore ku Isi ryashyizeho uburyo bushya bwo gusuzuma abakinnyi kugira ngo hamenyekane abemerewe gukina mu cyiciro cy’abagore.
Muri aya mabwiriza mashya, harimo ko abakinnyi bazajya basabwa gupimwa ikimenyetso cya SRY gene, kiboneka kuri chromosome Y kandi gifitanye isano n’iterambere ry’imiterere y’umubiri w’umugabo.
Isuzuma rishobora gukorwa hifashishijwe umusatsi wo mu kanwa, amaraso cyangwa amacandwe. Umukinnyi agomba kuba yaratsinze iryo suzuma kugira ngo yemererwe gukina amarushanwa y’abagore ategurwa na WTA.
Iyo isuzuma rigaragaje ko hari Chromosome Y, umukinnyi ashobora gukorerwa ibindi bizamini by’ubuvuzi mbere yo gufata umwanzuro wa nyuma ku kuba yemerewe gukina cyangwa kutemererwa. Mu bindi abakinnyi basabwa ni ugusinya ku nyandiko ibamenyesha ko kwanga gukorerwa iri suzuma bishobora kubaviramo ibihano.
Ufatwa nka nimero ya mbere ku Isi mu bagore, Aryna Sabalenka, yashyigikiye izi mpinduka, avuga ko nta kibazo yaba afite cyo gukorerwa iri suzuma. yongeraho ndetse ko ari ngombwa ko tennis ikomeza kugira uburinganire mu marushanwa, ashimangira ko ashyigikiye icyemezo cyo gusuzuma abakinnyi. Ati: “Ni ingenzi cyane gukomeza ubutabera mu marushanwa yacu.”
Uyu mukinnyi w’imyaka 28 yavuze ko yumva abagore bafite ububasha butandukanye n’abagabo ku bijyanye n’imbaraga z’umubiri, bityo hakwiye kubaho amabwiriza arengera irushanwa ry’abagore. akanavuga kandi ko niba abakinnyi bose basabwa gukorerwa isuzuma, we nta kibazo yabigiramo.