Alcaraz, uri ku mwanya wa gatatu ku rutonde rw'abakinnyi ba Tennis ku isi, aheruka gukina muri Mata 2026 ubwo yakiniraga irushanwa rya Barcelona Open, ariko aza kuvunikira muri iryo rushanwa.
Iyo mvune yatumye adakina amarushanwa akomeye arimo French Open "Roland Garros" ndetse na Wimbledon, bityo abura amahirwe yo kwisubiza ibikombe yari yaratwaye muri ayo marushanwa.
Uyu mukinnyi w'imyaka 23 ntazagaragara kandi muri Canadian Open izabera i Montreal kuva tariki ya 2 kugeza ku ya 13 Kanama, ariko gahunda ye ni ugukina Cincinnati Open izatangira tariki ya 13 ikarangira ku ya 23 Kanama 2026.
Hitezwe ko iri rushanwa rizamufasha kugerageza kureba uko ubuzima bwe buhagaze mbere yo kwitabira US Open, irushanwa rya nyuma rya Grand Slam muri uyu mwaka, aho azaba ari we urengera igikombe yegukanye umwaka ushize.
Alcaraz kandi ni we uheruka kwegukana igikombe cya Cincinnati Open nyuma y'uko Jannik Sinner atabashije kurangiza umukino wa nyuma kubera uburwayi.
Nubwo we yitegura kugaruka, mugenzi Sinner we akomeje kwitwara neza kuko yamaze kwegukana amarushanwa yose uko ari atanu ya ATP Masters 1000 yakinwe muri uyu mwaka. Uyu Mutaliyani akazanakina Canadian Open nyuma yo kongera gutwara igikombe cya Wimbledon ku nshuro ya kabiri yikurikiranya.
Ku ruhande rw'u Bwongereza, Emma Raducanu ntazitabira Cincinnati Open kubera imvune y'igufa ryo ku kuguru hasi yamukuye muri Wimbledon. Icyakoza aracyakora ibishoboka byose ngo azabe ameze neza mbere ya US Open iteganyijwe gutangira tariki ya 30 Kanama.
Mu gihe undi Mwongereza Jack Draper ashobora gukenera ubutumire bwihariye "wildcard" kugira ngo akine iri rushanwa, mu gihe Arthur Fery, umaze kuba nimero ya mbere mu Bwongereza, yamaze kubona umwanya wo kuryitabira nyuma yo kuzamuka ku mwanya wa 36 ku isi akesha kugera muri 1/2 cya Wimbledon.