Aryna Sabalenka yahuye n’akaga muri Canadian Open, aho yasezerewe na Ekaterina Alexandrova mu mikino ya 1/8, mu gihe habura ibyumweru bike ngo atangire urugamba rwo kurinda igikombe cya US Open yatwaye umwaka ushize.
Uyu nimero ya mbere mu bagore w’imyaka 28, yatsinzwe na Alexandrova amaseti 2-1, aho umukino warangiye ku manota 7-6 (7-3), 4-6, 6-4, nyuma yo kumara hafi amasaha abiri n’igice.
Uyu mukinnyi ukomoka muri Belarus yashoboye kugaruka mu mukino nyuma yo gutsindwa iseti ya mbere, atsinda iya kabiri ku manota 6-4, ariko mu iseti ya nyuma ntiyabashije kwirinda amakosa. Alexandrova yabonye intsinzi nyuma y’uko Sabalenka akoze double fault. Uko ni ko kandi umu-Russia w’imyaka 16 ku rutonde witabiriye iri rushanwa yabonye itike yo gukomeza.
Iyi ntsinzi ya Alexandrova ije mu gihe Sabalenka akomeje kugira igihe kitoroshye muri uyu mwaka. Nyuma Yuko asezerewe muri 1/4 cya Roland Garros, mbere yo gukurwa muri Wimbledon muri 1/8.
Mu mukino utaha, Alexandrova azahura na Elina Svitolina, nyuma y’uko uyu munya-Ukraine asezereye Umunyamerika Amanda Anisimova ku maseti abiri, 6-2, 6-4. Jessica Pegula wari ku mwanya wa gatatu muri iri rushanwa na we yasezerewe, nyuma yo gutsindwa na Diana Shnaider.
Mu gihe Shnaider w’imyaka 22, ukomoka mu Burusiya, yatsinze Pegula amaseti abiri, 6-3, 6-3, biba ubwa mbere amutsinze mu mikino bamaze gukinana.
Shnaider we akazahura na Iga Swiatek, wasezereye Marta Kostyuk nyuma yo gutakaza iseti ya mbere, ariko akaza guhindura umukino atsinda amaseti abiri yakurikiyeho.
Mu irushanwa ry’abagabo naryo riri kubera i Montreal, Umwongereza Cameron Norrie na we yasezerewe muri 1/8, nyuma yo gutsindwa n’Umufaransa Arthur Fils uri ku mwanya wa 18 mu iri rushanwa, wamutsinze amaseti abiri ku busa, 6-2, 7-6 (10-8), mu mukino wamaze isaha imwe n’iminota 43.
Norrie yabonye amahirwe yo kunganya umukino, ariko ntiyabasha kuyabyaza umusaruro. kuko mu iseti ya kabiri, yakijije amanota atatu yari gutuma atsindwa umukino, mbere yo kujya muri tie-break. ariko mugenzi we yakomeje gukomera maze atsinda iyo tie-break ku manota 10-8, ahita akatisha itike yo gukomeza muri 1/4.
Mu mikino ya 1/4, Arthur Fils azahura n'umunya Espanye Rafael Jodar wasezereye Jiri Lehecka wari ku mwanya wa munani, amutsinze 6-3, 6-3.
