Ni icyemezo kizashyira ku murongo umwe amarushanwa akomeye arimo Italian Open, Canadian Open na Cincinnati Open, yari atarasangiza abakinnyi b’abagore n’abagabo ibihembo bingana.
Aya marushanwa azaba yinjijwe mu yandi asanzwe atanga ibihembo bingana, arimo Indian Wells, Miami Open, Madrid Open n’amarushanwa akomeye akomeye abera mu Bushinwa.
Ibi kandi bihura n’imikorere y’amarushanwa ane akomeye ya Tennis ku Isi, azwi nka Grand Slams, ndetse na United Cup, na byo bitanga ibihembo bingana ku bagore n’abagabo.
Mu 2023, Ishyirahamwe rya Tennis mu Butaliyani ryari ryatangaje gahunda yo gutanga ibihembo bingana mu irushanwa rya Italian Open ribera i Roma mu gihe cy’imyaka itatu. Gusa, iyo ntego ntiyashoboye kugerwaho mu 2025 nk’uko byari byitezwe.
Valerie Camillo, uyobora WTA, yavuze ko kugera ku rwego rwo gutanga ibihembo bingana mu marushanwa yose ya WTA 1000 ahuza abagore n’abagabo ari intambwe ikomeye mu iterambere rya Tennis.
Yagize ati: “Kugera ku bihembo bingana mu marushanwa yose ya WTA 1000 ahuza ibyiciro byombi ni intambwe ikomeye kuri Tennis.”
Yakomeje avuga ko iki cyemezo kigaragaza ubushake bwa WTA bwo gukomeza guteza imbere uburinganire bw’abakinnyi mu mahirwe yo guhatanira ibihembo no mu nyungu z’amafaranga, kandi ko gishingiye ku cyerekezo cy’abashinze iri shyirahamwe.
WTA yatangaje kandi ko umwaka wa 2027 uzaba urimo amarushanwa 55 azabera mu bihugu n’uduce 26 hirya no hino ku Isi.
Irushanwa rya nyuma ry’umwaka, WTA Finals, ryo rizabera i Charlotte, muri Leta ya North Carolina muri Leta Zunze Ubumwe za Amerika, guhera mu 2027, aho riteganyijwe kumara nibura imyaka itatu rikibera muri uwo mujyi.
WTA yatangaje ko abagore bazajya bahembwa kimwe n’abagabo mu marushanwa yose itegura guhera mu 2027