Aya makuru yatangajwe kuruyu wa Kabiri na Wilson Morales, washinze urubuga BlackFilmandTV, nyuma y'ibirori byo kumurika trailer ya mbere y'iyi filime byabereye mu Mujyi wa New York.
Mu ijambo rye, umuyobozi wa filime Gina Prince-Bythewood yavuze ko Tems ari we uzayobora ibikorwa byose bijyanye n'umuziki wa Children of Blood and Bone, ndetse ko yanahimbye indirimbo eshatu z'umwimerere zizumvikana muri iyi filime.
Aya makuru aje nyuma y'amasaha make hasohotse trailer ya mbere y'iyi filime, yanagaragayemo bwa mbere umuhanzikazi Ayra Starr mu rugendo rwe rwo gukina filime.
Ayra Starr, ufite uruhare muri iyi filime ishingiye ku gitabo cyamamaye cyanditswe na Tomi Adeyemi, yari yaratangaje ko ari yo filime ya mbere ikomeye azagaragaramo nk'umukinnyi.
Indirimbo ya Tems yitwa "Me & U" na yo yumvikana muri teaser ya mbere y'iyi filime, ibintu byarushijeho kuzamura amatsiko y'abafana.
Children of Blood and Bone, yakozwe na Paramount Pictures, ishingiye ku gitabo cyamamaye cya Tomi Adeyemi. Iyi filime ikinwemo n'ibyamamare birimo Viola Davis, Idris Elba, Cynthia Erivo, Chiwetel Ejiofor, Lashana Lynch, Richard Mofe-Damijo, Ayra Starr, na Damson Idris.
Iyi filime iyobowe na Gina Prince-Bythewood, biteganyijwe ko izatangira kwerekanwa mu mazu ya sinema ku wa 15 Mutarama 2027.
Tems na Ayra Starr bagiye kugaragara muri filime yitwa Children of Blood and Bone