Igitaramo "Easter Jubilee" kizabera muri BK Arena kuri Pasika tariki ya 05 Mata 2026. Ni igitaramo gikomeye kizajya kiba buri mwaka kuri Pasika. Cyateguwe mu rwego rwo gufatanya n'abakristo kwizihiza umunsi mukuru wa Pasika. Ni umunsi ukomeye ku ku bakristo b'Isi yose aho baba bizihiza Izuka rya Yesu Kristo.
Ben na Chance baririmbye "Zaburi Yanjye" yabaye ibendera ry'umuziki wabo, bazataramana n'abahanzi batandukanye barimo Papi Clever na Dorcas baririmbana nk'umugabo n'umugore ndetse na Alicia na Germaine batuye mu Karere ka Rubavu, akaba ari itsinda ry'abakobwa bavukana rikunzwe mu ndirimbo "Rugaba", "Ibendera" n'izindi.
Alpha Rwirangira yifashe amashusho atumira abantu bose muri iki gitaramo cy'amateka. Ati: "Ndi hano kubatumira mu gitaramo cya Ben na Chance bise Easter Jubilee kizaba ku itariki ya 05 Mata 2026. Ndakwinginze ntuzabure, aba bakozi b'Imana barasizwe, bari mu muhamagaro wabo, bari mu bintu Imana yabahamagariye".
Yakomeje yibutsa abantu ko hasigaye iminsi micye cyane ati "ntuzacikwe kuko iminsi isigaye ni micye, gura itike yawe uzajye kubashyigikira". Yabibukije ariko ko ikintu cy'ingenzi. Ati: "Ariko ikiruta byose uziyeranje utegure umutima wawe witegure kugirana ubusabane n'Imana biciye muri aba bakozi b'Imana. Ahasigaye Imana ibahe umugisha".
Amatike yo kwinjira muri iki gitaramo ari hanze. Kugura itike mbere ni bwo buryo bwiza kuko ahendutse. Amatike ya Upper Room aragura 5,000 Frw ku bayagura muri iyi minsi ya mbere y’igitaramo, mu gihe ku munsi w’igitaramo azaba agura 10,000 Frw. Amatike ya Stage View ari kugura 10,000 Frw, mu gihe ku munsi w’igitaramo azaba agura 15,000 Frw.
Amatike ya Premium aragura 20,000 Frw, aya Altar Zone aragura 25,000 Frw, aya CIP Zone aragura 35,000 Frw naho aya Executive Zone aragura 50,000 Frw. Amatike ari kuboneka ku rubuga www.ticqet.rw ndetse wanayagura ukoresheje akanyenyeri: *513*01*01#. Abagura amatike bakoresheje ikarita ya BK bari kugabanyirizwa 20% ku giciro gisanzwe.
Amatike kandi ari kuboneka mu bice bitandukanye mu Mujyi wa Kigali nko kuri Zion Temple Gatenga, Foursquare Gospel Church Kimironko, Tecno Shop (Mu Mujyi), no kuri Uncle’s Restaurant Kicuciro.
Ben na Chance bakunzwe mu ndirimbo "Zaburi Yanjye", "Yesu Arakora" n'izindi, bamaze imyaka 10 mu muziki usingiza Imana. Ni itsinda ry'umugabo n'umugore rikunzwe cyane mu Rwanda no hanze. Ku nshuro yabo ya mbere bagiye gukorera igitaramo muri BK Arena ndetse bavuga ko bazajya bagikora buri mwaka kuri Pasika.
Iki gitaramo cyabo "Easter Jubilee Music Gathering" bagifata nk'umunsi udasanzwe wo kwizihiza Pasika binyuze mu kuramya Imana no mu muziki wuzuye ibyishimo, bazahuriramo n’abakunzi babo muri BK Arena, ahantu bavuze ko ari “mu rugo” hashobora kwakira no guhuza abakunzi b’umuziki bagera ku bihumbi icumi.
Alpha Rwirangira yasabye abazitabira igitaramo cya Ben na Chance gutegura imitima yabo
Ben na Chance bagiye gukora igitaramo cy'amateka bise "Easter Jubilee"
Ben na Chance badabagije abakunzi babo babegereza amatike y'igitaramo "Easter Jubilee"