Muri iri murikabikorwa, TECNO izerekana telefoni nshya yise Next-Gen Bezelless Concept Phone, mudasobwa nshya MEGABOOK T15 360 Pro ifite screen ishobora kuzenguruka kuri dogere 360°, ndetse n’ibindi bikoresho by’ikoranabuhanga byakozwe ku bufatanye na Tonino Lamborghini.
Abazitabira iri murikabikorwa bazagira amahirwe yo kwirebera ibi bikoresho ku wa 3 Nzeri 2026, muri Hall 5.3, kuri za stand za TECNO ziri ku meza ya 501 na 503 muri Berlin Messe, guhera saa kumi n’ebyiri z’umugoroba kugeza saa cyenda.
TECNO igiye kumurika telefoni idafite aho screen igarukira
Muri telefoni nshya TECNO izerekana, Next-Gen Bezelless Concept Phone ni yo iri mu bizitabwaho cyane. TECNO ivuga ko iyi telefoni ifite umupaka wa screen wa 0mm, bivuze ko nta gace k’umukara gasigara hagati y’ahagaragara amashusho n’ikadiri yo ku mpande za telefoni.
Ku ma telefoni menshi agezweho, nubwo screen iba ari nini kandi igera hafi ku mpera z’igikoresho, hakomeza kubaho agace gato k’umukara kari hagati ya screen n’ikadiri.
TECNO ivuga ko kuri iyi telefoni yakoze ibishoboka byose kugira ngo ako gace kose gakurweho.
Ibi byagezweho binyuze mu guhindura imiterere y’ibice bigize telefoni, uburyo bitondekwa imbere ndetse n’uburyo screen ikorwa igashyirwa mu gikoresho.
TECNO ivuga ko ibi bizaha uyikoresha ishusho isa n’aho screen yuzuye imbere ya telefoni, bigatuma kureba amashusho no gukoresha telefoni birushaho kuba bishimishije.
Iyi telefoni izaba igaragaye bwa mbere imbonankubone muri IFA ShowStoppers 2026, nyuma y’uko TECNO yerekanye Modular Concept Phone muri MWC 2026.
MEGABOOK T15 360 Pro izajya ihinduka mu buryo butandukanye
TECNO izanamurika mudasobwa nshya MEGABOOK T15 360 Pro, iri mu muryango wa MEGABOOK T15 360 Series.
Iyi mudasobwa ifite uburyo bwo kuzengurukisha screen yayo kuri dogere 360°, ndetse ikemera gukorwaho ahantu 10 icyarimwe.
Ibi bituma uyikoresha ashobora kuyishyira mu buryo butandukanye bitewe n’umurimo ari gukora. Ishobora gukoreshwa nk’umudasobwa usanzwe cyangwa igahindurwa ikamera nka tablet.
MEGABOOK T15 360 Pro izaba ifite écran ya 15.6-inch, 2.5K na 120Hz, ndetse ikazashyigikira ikaramu y’ikoranabuhanga ya MPP 2.0. Izakoresha Intel Core Ultra processor ifite NPU ifasha mu mirimo ishingiye ku bwenge buhangano (AI), ndetse izaba ifite batiri ya 70Wh.
TECNO izerekana izindi MEGABOOK nshya
TECNO izazana kandi izindi mudasobwa ebyiri nshya, ari zo MEGABOOK K15S WCL na MEGABOOK T17 Ultra.
MEGABOOK K15S WCL igenewe abashaka mudasobwa ibafasha mu mirimo isanzwe ya buri munsi, mu gihe MEGABOOK T17 Ultra yo izaba ari mudasobwa ya mbere ya TECNO ifite screen nini ya 17-inch.
MEGABOOK T17 Ultra izakoresha Intel Meteor Lake Ultra processor ifite NPU, ikagira batiri ya 99.99Whndetse ikaba ishobora gushyirwamo umuriro ukoresheje uburyo bwa 100W GaN fast charging.
TECNO na Tonino Lamborghini bongereye imbaraga mu bufatanye
Muri IFA ShowStoppers 2026, TECNO izanamurika ibikoresho yakoze ku bufatanye na Tonino Lamborghini, ikirango kizwiho igishushanyo mbonera cyihariye cyo mu Butaliyani.
Muri ibyo bikoresho harimo TECNO POVA 8 PRO 5G Tonino Lamborghini Limited Edition, biteganyijwe ko izatangira kuboneka ku isoko ku wa 4 Nzeri 2026.
Iyi telefoni izaba ifite imikorere ikomeye, camera zikoresha Sony sensors ndetse n’imikorere itandukanye ishingiye ku bwenge buhangano (AI). Hari kandi TECNO MEGAPAD 2 Tonino Lamborghini Limited Edition, tablet izasohoka mu gihembwe cya kane cya 2026.
Iyi tablet izaba ifite screen ya 11-inch 2.5K, ikomatanya igishushanyo cya Tonino Lamborghini n’ikoranabuhanga rya AI.
TECNO izanerekana TECNO TAURUS (MEGA MINI G1 Pro), mudasobwa ntoya ikoresha uburyo bwo gukonjesha hakoreshejwe amazi. Uruganda ruvuga ko ari yo mudasobwa ntoya ku isi ikoresha ubu buryo bwo gukonjesha, ikaba ifite umubiri wubatswe mu cyuma ndetse n’amatara ya RGB.
Ibindi bikoresho TECNO izamurika
TECNO izazana kandi ibindi bikoresho bigenewe ibikorwa bya buri munsi, birimo CAMON Slim 5G, telefoni ifite umubyimba wa 6.39mm, ikomatanya igishushanyo cyiza, ubushobozi bwo gufata amafoto n’imikorere ya AI.
Hari kandi CAMON Slim, nayo ifite umubyimba wa 6.39mm, umubiri ugoramye mu mpande ndetse na camera ya 50MP Sony LYTIA 600 Ultra Night.
Ku bijyanye na tablets, TECNO izerekana MEGAPAD SE 2, yakozwe hagamijwe gufasha abayikoresha kwiga no gukora imirimo yabo hifashishijwe AI. TECNO izanamurika Watch 4, isaha y’ikoranabuhanga igenewe gukurikirana ibikorwa bya siporo n’ibindi bikorwa bya buri munsi.
Naho Buds 5 ni utwuma two kumviraho dushobora kumara amasaha agera kuri 50 dukora, mu gihe agasanduku tubikwamo gashobora no gukoreshwa nk’aho telefone ishyirwa.
TECNO ivuga ko kwitabira IFA ShowStoppers 2026 bizayiha umwanya wo kwerekana udushya iri kuzana mu ikoranabuhanga, aho yibanze ku guhuza ubwenge buhangano (AI), igishushanyo mbonera n’imikorere mishya, mu bikoresho bitandukanye birimo telefoni, mudasobwa, tablets, amasaha n’ibindi bikoresho by’ikoranabuhanga.
TECNO igiye kumurika telefoni idafite aho screen igarukira na mudasobwa izenguruka kuri dogere 360°