Umuhanzikazi w'icyamamare Taylor Swift aracyakomeje kuvugwa mu rubanza yari yararezwemo kwiba amagambo y'indirimbo, nyuma y'uko umusizi wo muri Leta ya Florida witwa Kimberly Marasco ajuririye icyemezo cy'urukiko cyatesheje agaciro ikirego cye.
Kimberly Marasco yatanze ubujurire mu rukiko rwisumbuyeho mu gihe kitageze no ku minsi ibiri nyuma y'uko umucamanza afashe icyemezo cyo gutesha agaciro ikirego cye, agaragaza ko yifuza ko icyo cyemezo cyasubirwamo.
Mu cyemezo cyafashwe n'urukiko, havuzwe ko ibyo Marasco yavugaga ko byibwe byari amagambo n'ibitekerezo bisanzwe, bidafite umwihariko watuma hafatwa umwanzuro w'uko habayeho kwica uburenganzira bw'umwanditsi.
Ubu bujurire bwongeye kongera indi ntambwe muri uru rubanza rumaze imyaka irenga ibiri ruburanwa hagati ya Marasco na Taylor Swift. Muri icyo gihe, Marasco yatanze ibirego bibiri bitandukanye, ariko byose byaje guteshwa agaciro n'inkiko.
Abunganira Taylor Swift mu mategeko bakomeje kuvuga ko ibyo birego nta shingiro bifite, babisobanura nk'ibirego bidafite ishingiro kandi bigamije kumuharabika.
Kimberly Marasco yari yarashinje Taylor Swift gukoresha amagambo n'ibitekerezo byo mu bitabo bye by'imivugo mu ndirimbo zirimo The Man, The Great War ndetse n'izindi ziri kuri album The Tortured Poets Department, asaba ko umuhanzi yabiryozwa mu mategeko.
Taylor Swift yongeye kwisanga mu nkiko nyuma y'ubujurire bwa Kimberly Marasco