Taylor Swift yabaye umuhanzi wa mbere ku Isi wumviswe cyane mu mateka ya Spotify

Ni ku nshuro ya mbere uru rubuga rugaragaje uru rutonde rusesenguye imyaka 20 y’ukuntu isi yagiye yumva umuziki, podcasts ndetse n’ibitabo by’amajwi (audiobooks).

Ni imibare igaragaza neza uko uburyo bwo kumva umuziki bwahindutse, ndetse n’abahanzi bashoboye kuguma ku isonga mu bihe bitandukanye.

Ku rutonde rw’abahanzi, Taylor Swift ni we uri ku mwanya wa mbere nk’umuhanzi wacuranzwe inshuro nyinshi kurusha abandi mu mateka ya Spotify.

Akurikiwe na Bad Bunny, umaze imyaka mike ishize agaragaza ubukomeye bukomeye mu muziki wo ku rwego mpuzamahanga.

Aba bahanzi bakurikirwa n’ibihangange nka Drake, The Weeknd na Ariana Grande, bigaragaza uko injyana nka Pop, Hip-Hop na Latin zikomeje kwiharira umwanya munini mu muziki w’iki gihe.

Igitangaje muri uru rutonde ni uko ruvangamo ibisekuru bitandukanye. Nubwo abahanzi bashya bakomeje kuyobora, abakera nka Eminem, Rihanna na Coldplay na bo bagumye mu bafite izina rikomeye, bigaragaza ko indirimbo zakunzwe kera zigifite agaciro no mu gihe cya ‘streaming’.

Mu cyiciro cya album, iyitwa Un Verano Sin Ti ya Bad Bunny ni yo iri ku mwanya wa mbere, imaze gucurangwa inshuro zirenga miliyari 22 kuva yasohoka mu 2022. Ikurikiwe na Starboy ya The Weeknd na ÷ (Divide) ya Ed Sheeran.

Hari kandi album nka Sour ya Olivia Rodrigo na After Hours zagaragaye cyane, bigaragaza uburyo abahanzi bashya bashobora guhita binjira ku rwego rwo hejuru mu gihe gito.

Ku bijyanye n’indirimbo, iyitwa Blinding Lights ya The Weeknd ni yo ya mbere mu zacuranzwe cyane mu mateka ya Spotify. Iyi ndirimbo yabaye nk’ikirango cy’igihe cya ‘streaming’ kubera uburyo yakomeje gukundwa igihe kirekire.

Ikurikirwa na Shape of You ya Ed Sheeran na Sweater Weather y’itsinda The Neighbourhood, mu gihe n’indirimbo nka As It Was ya Harry Styles na zo zigaragaza uko umuziki wa Pop ugeze kure ku isi.

Si umuziki gusa wagarutsweho. No mu bijyanye na ‘podcasts’, The Joe Rogan Experience ni yo iyoboye mu zacuranzwe cyane, mu gihe igitabo cy’amajwi ‘A Court of Thorns’ and ‘Roses’ ari cyo cyumviswe cyane n’abakoresha Spotify bafite konti zishyurwa.

Iyi mibare yose igaragaza impinduka zikomeye zabaye mu myidagaduro. Ubu si ukumva umuziki gusa byahindutse, ahubwo uburyo bwo kumvira ibihangano kuri Internet (streaming) byahinduye uburyo abahanzi bagera ku bakunzi babo ku rwego mpuzamahanga, igashyira imbere abashobora guhanga ibihangano bikundwa n’abantu benshi kandi bigakomeza kubaho igihe kirekire.

Nyuma y’imyaka 20 Spotify ibayeho, imibare yayo yemeje ko Taylor Swift ari we uyoboye abandi bahanzi bose mu kumvwa cyane ku Isi

Taylor Swift ni we uyoboye urutonde rw’abahanzi bumviswe cyane mu mateka ya Spotify, agaragaza imbaraga ze mu muziki ku rwego mpuzamahanga

Album Un Verano Sin Ti ya Bad Bunny ni yo iri ku mwanya wa mbere mu zacuranzwe cyane, imaze gukundwa ku rwego rudasanzwe

Indirimbo Blinding Lights ya The Weeknd ni yo iyoboye izacuranzwe cyane, igaragaza uko yakunzwe igihe kirekire

The Joe Rogan Experience ni yo podcast yumviswe cyane kuri Spotify, igaragaza izamuka ry’ijwi ry’ibiganiro ku Isi

Igitabo A Court of Thorns and Roses ni cyo cyumviswe cyane mu bitabo by’amajwi, kigaragaza uko iyi serivisi igenda irushaho gukundwa