Iyi myigaragambyo irimo gutegurwa n'urubyiruko rusaba ko hakorwa impinduka mu miyoborere ishingiye kuri demokarasi, ndetse hakanatangwa ubutabera ku bantu bishwe mu mvururu zabaye nyuma y'amatora yabaye umwaka ushize.
Mu cyumweru gishize, Guverinoma yatangaje ko ibujije ibikorwa byose by'imitwe ya politiki birimo inama n'amakoraniro, ivuga ko yafashe uwo mwanzuro mu rwego rwo kurinda umutekano w'igihugu, nubwo itigeze itangaza igihe iri tegeko rizamara.
Ni mu gihe Imyigaragambyo iteganyijwe ibaye nyuma y'uko komisiyo yashyizweho na Leta itangaje ko abantu nibura 518 ari bo bapfuye mu mvururu zakurikiye amatora.
Gusa amashyaka atavuga rumwe n'ubutegetsi hamwe n'imiryango ishingiye ku madini yo avuga ko umubare w'abahitanywe n'inzego z'umutekano urenze kure uwo, ukaba ugera mu bihumbi.
Izi mvururu kandi zatewe ahanini n'uko bamwe mu bakandida bakomeye batavuga rumwe n'ubutegetsi batemerewe kwiyamamaza mu matora yegukanywe na Perezida Samia Suluhu Hassan ku majwi hafi 98%.
Perezida Samia Suluhu Hassan yavuze ko imyigaragambyo yabaye yari umugambi wo guhirika ubutegetsi bwe, mu gihe inzego za Leta zakomeje guhakana ibyo imiryango iharanira uburenganzira bwa muntu ivuga ko inzego z'umutekano zakoresheje imbaraga z'umurengera mu guhangana n'abigaragambyaga.