Uyu muyobozi wungirije muri iri shyaka rya Chadema, yafashwe ubwo yari agiye kwitabira urubanza rwa Tundu Lissu, umuyobozi w'ishyaka ukekwaho cyo gushaka kugambanira igihugu.
Mu itangazo, ishyaka rya Chadema ryavuze ko leta ifite umugambi wo "guta muri yombi abayobozi bakuru b'ishyaka no kubafunga kugeza amatora arangiye", ateganyijwe kuba ku itariki ya 29 Ukwakira
Ryavuze ko Heche yafashwe ubwo yageraga ku rukiko rukuru rwa Dar es Salaam kuri uyu wa Gatatu. Iri shyaka kandi ryavuze ko yajyanywe mu mujyi wa Tarime, mu majyaruguru y'igihugu, ni mu bilometero 1,300 uvuye mu mujyi wa Dar es Salaam.
Polisi yo nta cyo iratangaza ku ifatwa rye, ku nshuro ya kabiri mu cyumweru kimwe.
Ku wa Gatandatu, yari yafashwe by'akanya gato ubwo yageragezaga kwambuka ajya muri Kenya, bivugwa ko yari agiye mu muhango wo gushyingura uwahoze ari Minisitiri w'Intebe wa Kenya, Raila Odinga.
Ishami rya Leta rishinzwe abinjira n'abasohoka muri Tanzaniya ryatangaje ko Heche yari agiye kwambuka umupaka mu buryo bunyuranyije n'amategeko, ariko Chadema yahakanye ibyo ashinjwa.
Ifatwa rya Heche ribaye mu gihe hakomeje kuvugwa ibura ry'uwahoze ari Ambasaderi wa Tanzaniya, akaba n'umwe mu bakunze kunenga ubutegetsi.
Umuryango wa Humphrey Polepole wavuze ko yashimutiwe iwe mu rugo i Dar es Salaam ku wa 6 Ukwakira (10).
Umuvandimwe we yavuze ko yasanze urugi rw'inzu ye rwamenetse kandi hari amaraso menshi yamenetse.
Perezida Samia Suluhu Hassan ari kwiyamamariza manda ya kabiri, gusa ni ubwa mbere yitabiriye amatora ya perezida, kuko yagiye ku butegetsi mu 2021 asimbuye John Magufuli witabye Imana.