Tanzania: Leta yategetse abakozi bose gukorera mu rugo mu gihe imyigaragambyo ikomeje gukaza umurego

Itangazo ryasohowe ku mugoroba wo ku wa Gatatu, ryashyizweho umukono n’Umuvugizi wa Leta Gerson Msigwa, ryemeza ko iki cyemezo cyafashwe “mu rwego rwo gukumira ibyahungabanya umutekano w’igihugu, by’umwihariko mu mujyi wa Dar es Salaam.”

Leta yanakanguriye n’abikorera ku giti cyabo gukurikiza iyi nama, ndetse isaba abaturage bose kwirinda gusohoka mu rugo keretse hari impamvu yihutirwa.

Ambasade ya Leta Zunze Ubumwe za Amerika muri Tanzania na yo yasohoye itangazo rihamagarira abakozi bayo n’abanyamerika bari mu gihugu kwitwararika no kwirinda ahabera imyigaragambyo.

Ku wa Gatatu tariki 29 Ukwakira 2025, ni bwo Abanyatanzania batoye Umukuru w’Igihugu, abadepite n’abayobozi b’uturere. Aya matora ariko yabaye mu gihe cy’imyigaragambyo ikomeye, by’umwihariko mu mujyi wa Dar es Salaam, aho urubyiruko rwinshi rwiraye mu mihanda ruvuga ko rurambiwe amatora adasobanutse.

Ibinyamakuru bitandukanye bivuga ko abantu babiri basize ubuzima muri iyi myigaragambyo naho abandi benshi bakaba barakomeretse.