Knight, ubu uri muri
gereza, yabivuze mu kiganiro yagiranye na TMZ Live ku wa Kabiri, tariki ya 25
Kanama. Yavuze ko yanze ayo mafaranga, ashimangira ko ubudahemuka afitiye Tupac
budashobora kugurwa.
Yagize ati, “Ubudahemuka
bwange kuri Tupac ntibushobora guhungabanywa.”
Knight kandi yanenze umuraperi
The Game, nyuma y’uko uyu aherutse kuvuga ko Keefe D ashobora kuba ari gushyirwaho
amakosa yose y’urupfu rwa Tupac. The Game yavuze ko amaze imyaka igera kuri 15
azi umuntu wishe Tupac, ndetse ko abantu bamwe bo muri Compton na Los Angeles
bazi neza ibyabaye.
Ariko Knight ntiyemeranya
n’ibyo The Game avuga. Yashimangiye ko hari abantu bakomeje gukoresha urupfu
rwa Tupac kugira ngo babone ibitekerezo byinshi n’icyubahiro mu itangazamakuru.
Knight yavuze ko ubuzima
bwa Tupac “atari umukino wo gukiniraho”, anenga abantu benshi bakomeje kugira
ibyo bavuga ku rubanza mu ruhame mu gihe iperereza n’urubanza bikomeje.
Nubwo Suge Knight yavuze
ko yemera ko abantu barenze umwe bagize uruhare mu iyicwa rya Tupac, ntiyigeze
avuga ku buryo budasubirwaho niba Keefe D ari umwere cyangwa afite uruhare muri
ubwo bwicanyi.
Yongeyeho kandi ko hari abapolisi
bari ku kazi ndetse n’abapolisi bari hanze y’akazi ashaka kuvuga ko bagize
uruhare mu bintu byari bikikije urupfu rwa Tupac, ndetse avuga ko bamwe muri bo
bari “abapolisi babi.”
Tupac Shakur yarashwe mu
mwaka wa 1996 ubwo yari mu modoka i Las Vegas, muri Leta ya Nevada, muri
Amerika, nyuma aza kwitaba Imana azize ibikomere.
Ku bijyanye n’amakuru
avuga ko ikipe ya Keefe D yaba yaratanze miliyoni imwe y’amadolari kuri Suge
Knight, ayo makuru yatangajwe na Knight ubwe kandi ntarashyigikirwa
n’ibimenyetso byigenga bigaragara muri aya makuru.
Urubanza rwa Duane “Keefe
D” Davis ku birebana n’urupfu rwa Tupac Shakur ruracyakomeje, kandi ibyaha
aregwa ntibikwiye gufatwa nk’ibyemejwe n’urukiko kugeza igihe urubanza
ruzarangirira.