Ishyirwaho rya Steward Soroba Budia ryatangajwe mu itegeko-teka rya Perezida ryo ku itariki ya 30 Mutarama uyu mwaka, ariko ibitangazamakuru byo muri icyo gihugu byagaragaje ko uwo wahoze mu ishyaka ritavuga rumwe n’ubutegetsi rya UDP (United Democratic Party), yapfuye mu myaka itanu ishize.
Ibyo byatumye abantu ku mbuga nkoranyambaga baha inkwenene uko gushyirwa mu mwanya kwe. Nta mpamvu ritanze, itangazo rya leta ryavuze ko Perezida yirukanye umujyanama we mu by’itangazamakuru David Amour Major hamwe na Valentino Dhel Malueth, umutegetsi mukuru muri minisiteri ishinzwe ibikorwa bya Perezida.
Iryo tangazo ryashyizwe ku rubuga rwa Facebook rw’ibiro bya Perezida, rigashyirwaho umukono na Minisitiri Africano Mande Gedima ushinzwe ibikorwa bya Perezida, rivuga ko Kiir “ashimishijwe” no kumenyesha ko abo babiri bakuwe mu nshingano zabo, ndetse ko yifuje “gushimira byimazeyo” abo bombi ku bw’imirimo bakoze.
Ku wa mbere, Amour yasohoye itangazo rigenewe abanyamakuru avuga ko ibiro bya perezida byashingiye gusa ku “kuri no kwizerwa” kw’amazina yatanzwe n'"abafatanyabikorwa" kugira ngo ashyirwe muri ako kanama.
Amour yagize ati: “Ubu biragaragara ko igenzura ryimbitse ritakozwe n’umwe mu bafatanyabikorwa bigatuma haba iri genzura ry’ubutegetsi ribabaje.”
Ntiyavuze izina ry’uwo mufatanyabikorwa. Ishyaka UDP nta cyo ryatangaje. Ntibisobanutse niba iryo tangazo ryaviriyemo Amour kwirukanwa. Hari hasanzwe hari uguhwihwisa mbere yuko iryo tangazo risohoka ko azirukanwa.
Budia yari ari mu bashyize umukono ku masezerano y’amahoro yo mu 2018 yo kurangiza intambara yashegeshe Sudani y’Epfo nyuma yuko ibonye ubwigenge mu 2011.
Kiir yashyizeho ako kanama, kagizwe n’abahagarariye amashyaka anyuranye, kugira ngo gaharurire inzira amatora. Ariko hari amakenga ku kumenya niba ayo matora azaba, mu gihe iki gihugu kikiri mu ntambara.
Amatora yari ateganyijwe mbere yarasubitswe, Kiir akaba ari ku butegetsi kuva iki gihugu kibonye ubwigenge.
Umuryango w’Abibumbye uvuga ko abantu barenga 180,000 byemezwa ko bahunze kubera imirwano iherutse.
Leta ya Jonglei ni yo yibasiwe cyane mu gihe ingabo z’igihugu zirimo kurwana n’abasirikare bashyigikiye uwahoze ari Visi Perezida wahagaritswe ku kazi, Riek Machar.
Ubu afungishijwe ijisho mu rugo iwe ndetse arimo kuburanishwa mu rubanza ku bwicanyi, ubugambanyi n’ibyaha byibasiye inyokomuntu. Ahakana ibyo birego.
Kiir na Machar bakabaye ubundi bari muri leta y’ubumwe yemeranyijweho mu masezerano y’amahoro yo mu 2018, nyuma y’intambara yamaze imyaka itanu yakurikiye guhanganira ubutegetsi hagati y’abo bagabo bombi.