Iyi filime ikinwamo Tom Holland na Zendaya, basanzwe ari umugabo n'umugore mu buzima busanzwe, irushwa gusa na Avengers: Endgame, yinjije arenga miliyari 1.2 z'Amadolari mu mpera z'icyumweru cya mbere yasohotse mu mwaka wa 2019.
Muri Amerika na Canada, Spider-Man: Brand New Day yinjije miliyoni 335 z'Amadolari, iba iya kabiri mu mateka yinjije amafaranga menshi muri ako karere mu mpera z'icyumweru cya mbere.
Inkuru dukesha ikinyamakuru BBC News ivuga ko, aya mafaranga yinjijwe ararenze kure ingengo y'imari yakoreshejwe mu kuyikora, igera kuri miliyoni 225 z'Amadolari, byatumye ihita itangira kunguka mu minsi mike gusa.
Iyi ntsinzi ni inkuru nziza ku ruganda rwa Marvel Studios na Disney, zari zimaze imyaka zihura n'ibibazo byo kuba zimwe muri filime zazo zitagera ku musaruro wari witezwe nyuma y'intsinzi ikomeye ya Avengers: Endgame.
Filime Brand New Day ikomereza aho inkuru yarangiriye muri Spider-Man: No Way Home yasohotse mu 2021, aho Peter Parker akomeza urugamba rwo kurwanya ibyaha mu Isi yamwibagiwe burundu nk'intwari ya Spider-Man.
Abasesenguzi ba sinema n'abakunzi b'izi filime bayakiriye neza, bamwe bavuga ko ari yo Tom Holland yakinnye neza kurusha izindi zose kuva yatangira gukina Spider-Man.
Ni na yo filime ya nyuma ya Marvel izerekanwa muri sinema mbere y'uko hasohoka Avengers: Doomsday itegerejwe cyane mu Ukuboza 2026, izahuza inkuru nyinshi z'intwari za Marvel.
Nubwo filime nyinshi za Marvel zasohotse nyuma ya Endgame zitageze ku rwego rw'ibyo zari zitezweho, Spider-Man yakomeje kuba imwe muri filime zinjiza amafaranga menshi. Filime Spider-Man: No Way Home yo yinjije hafi miliyari ebyiri z'Amadolari ku Isi hose.
Mu gihe uruganda rwa sinema rwari rwarahungabanyijwe n'icyorezo cya COVID-19, cyatumye benshi bimukira ku mbuga zerekana filime nka Netflix, uyu mwaka wa 2026 urimo kugaragaza ko abantu bongeye gusubira kurebera filime muri sinema.
Abasesenguzi bavuga ko amafaranga yinjijwe na sinema muri Amerika y'Amajyaruguru ashobora kongera kurenga miliyari 10 z'Amadolari bwa mbere kuva muri 2019, bitewe n'intsinzi ya filime zirimo Toy Story 5, Michael, The Super Mario Galaxy Movie, ndetse na The Odyssey ya Christopher Nolan, nazo zitegerejwe kurenga miliyari imwe y'Amadolari zinjije ku Isi.