Sofiya Nzau yaciye agahigo kuri Spotify, aba uwa mbere muri Afurika y’Iburasirazuba

Iyi ni intambwe ikomeye ku muziki wo muri aka karere, igaragaza uko ugenda ugera kure ku rwego mpuzamahanga, aho ibikorwa by’abahanzi b’Afurika y’Iburasirazuba bikomeje kwakirwa neza ku isoko mpuzamahanga.

Indirimbo Mwaki ni yo iri ku isonga mu zamuhesheje iyi ntsinzi, kuko imaze kumvwa inshuro zirenga miliyoni 396. Iyo ubaruye na ‘remix’ zitandukanye zayo, irenga miliyoni 520 z’abayumvise, ibintu biyigira imwe mu ndirimbo zikomeye zasohotse muri aka karere mu myaka ya vuba.

Uretse “Mwaki”, Sofiya Nzau afite n’izindi ndirimbo zagize uruhare rukomeye muri iyi mibare nka ‘Wacuka’ imaze kurenga miliyoni 122, Your Love (Anddot Remix) imaze kurenga miliyoni 66, Digane ifite miliyoni zirenga 4.7, Kumbaya ifite miliyoni zirenga 8.3, na Away ifite miliyoni zirenga 6.9.

Izi ndirimbo zose zafashije mu gutuma ibikorwa bye bigera ku rwego mpuzamahanga no gukomeza kumenyekana ku masoko atandukanye.

Iyi ntambwe ya Sofiya Nzau igaragaza neza uburyo abahanzi bo muri Afurika y’Iburasirazuba batangiye kwinjira ku isoko mpuzamahanga ku kigero kiri hejuru, cyane cyane bitewe n’uruhare rw’imbuga zicururizwaho umuziki nka Spotify.

Ni intambwe itanga icyizere ku bandi bahanzi bo muri aka karere, kuko igaragaza ko bishoboka kugera ku rwego mpuzamahanga binyuze mu muziki.

Ubu Sofiya Nzau ari mu bahanzi bari kuzamuka cyane muri Afurika, aho abakunzi b’umuziki n’abasesenguzi bategerezanyije amatsiko intambwe azakomeza gutera mu minsi iri imbere.

 Sofiya Nzau yanditse amateka yo kuba uwa mbere muri Afurika y’Iburasirazuba ugeze kuri miliyoni 750 z’abamwumva kuri Spotify

Indirimbo Mwaki ya Sofiya Nzau ikomeje kuyobora, imufasha kugera ku ntera idasanzwe ku rwego mpuzamahanga