Sobanukirwa uko wakwita ku buzima bwawe bwo mu mutwe

"Ubuzima bwo mu mutwe" busobanuye ubuzima bwawe bwiza muri rusange. Harimo uburyo wiyumva wowe ubwawe, imibanire yawe n’abandi, ubushobozi ufite bwo gucunga ibyiyumviro byawe no guhangana n’ingorane uhuye nazo.

Umuntu wese arashobora guhura n’ibibazo by’ubuzima bwo mu mutwe cyangwa by’amarangamutima. Umwe muri Batanu b'Abanya-Canada abaho afite ibibazo byo mu mutwe cyangwa ibibazo aterwa no gukoresha ibiyobyabwenge.

Izi nama 10 dukesha urubuga bcmhsus.ca, zishobora kugufasha mu kuzamura uko wiyumva, kurushaho kwihangana no kwishimira ubuzima cyane:

1. Ita cyane ku guhura n’abantu imbonankubone

Guhamagara kuri telefone hamwe n’imbuga nkoranyambaga bifite umwanya wa byo, ariko guhura n’abantu amaso ku yandi, cyane cyane ba bandi ukunda ndetse n’abagutera imbaraga,birafasha cyane.

2. Ba umunyembaraga

Kuba umunyembaraga ni byiza cyane ku bwonko kimwe no ku mubiri. Imyitozo ngororangingo cyangwa ibindi bikorwa bisanzwe bishobora kugira ingaruka nziza ku buzima bwawe bwo mu mutwe no mu marangamutima yawe, bigabanya imihangayiko, bikagufasha kwibuka, no gusinzira neza.

3. Shaka umuntu muvugana

Vugisha umuntu wishimiye. Niba ufite impungenge cyangwa ufite ibiguhangayikishije, kubisangiza umuntu ukwitayeho ni bumwe mu buryo bwiza bwagufasha gutuza no kugabanya imihangayiko.

4. Kora icyo ibyiyumviro  byawe bigutegeka

Niba kumva indirimbo bigufasha gutuza ubikore. Niba kandi gutembera mu busitani cyangwa kumva amajwi y’ibiti n’inyoni bigufasha na byo ubikore. Umuntu wese agira ibyiyumviro  bitandukanye n’iby’undi, rero gerageza ushake icyakubera cyiza.

5. Kora imyitozo igufasha kuruhuka

Gufata umwanya ukitekerezaho, ugahumeka byimbitse bishobora kugufasha kugabanya ikigero cy’imihangayiko.

6. Shyira imbere umwanya w’imyidagaduro no gutekereza

Nibyo, twese dushobora kuba duhuze cyane ku buryo tubura umwanya na muto, ariko umwanya wo kwidagadura ni nkenerwa cyane mu buzima bw’amarangamutima n’ubwo mu mutwe. Fata umwanya muto wo kuruhuka, gutekereza no kwita ku bintu byiza.

 Andika niba ubishoboye kuko ushobora kubyibagirwa byoroshye.

 Noneho ubitekerezeho nyuma niba ugeze mu gihe kikugoye, ukeneye imbaraga.

7. Rya indyo yuzuye ifitiye ubwonko akamaro kugirango ushigikire ubuzima bwawe bwiza bwo mu mutwe

Ibiryo bishobora kugufasha birimo: amafi arimo amavuta akungahaye kuri omega-3s, imbuto, avoka, ibishyimbo, amababi y’ibishyimbo.

8. Jya ufata umwanya usinzire

Gusinzira ni uburyo bwiza bufasha umubiri n’ubwenge bwacu kongera kwivugurura. Bumwe mu buryo bwo gusinzira neza ni ugufata umwanya ukareka kureba muri televiziyo, telefone, tableti cyangwa mudasobwa yawe mu masaha mbere yo kuryama. Mu mwanya wabyo, soma cyangwa wumve indirimbo zituje.

9. Shakisha intego y’umunsi wawe n’igisobanuro cyayo

Ibi usanga bitandukanye ku bantu bose ariko kubona intego y’umunsi wawe, ni ikintu gikomeye ku buzima bwawe bwiza bwo mu mutwe.

10. Shaka ubufasha niba ubona ubukeneye

Niba wowe ubwawe ubona ukeneye ubufasha ku buzima bwo mu mutwe, ihutire ku baganga bavura indwara zo mu mutwe kugira ngo witabweho hakiri kare, hirindwa izindi ndwara cyangwa ibindi bibazo bikomeye wakuramo.