Sinzigera ncika intege - Umunyarwenya Samu Zuby wavanye isomo mu matora yatanze Umudepite

Samu Zuby yari mu rubyiruko rwahataniraga umwanya wo gusimbura Venuste Icyitegetse wari Umudepite uhagarariye urubyiruko, akaza kwegura kuri uyu mwanya.

Mu matora yabaye, Samu Zuby yabonye amajwi atandatu mu bantu 196 batoye, angana na 3%. Ibi byatumye aba uwa gatatu mu majwi, mu gihe Niyonshuti Ben ari we waje ku isonga.

Niyonshuti Ben yabonye amajwi 47 mu bantu 198 batoye, angana na 23,9%. Umukandida wamukurikiye yagize 10,2%.

Samu Zuby ntiyafashe umwanya wa gatatu nko gutsindwa

Nubwo atabashije kubona umwanya w’Ubudepite, Samu Zuby avuga ko ibyo yagezeho muri aya matora ari ikimenyetso cy’uko afite ubushobozi bwo gukomeza kwitwara neza mu bikorwa byo gukorera urubyiruko n’igihugu.

Mu butumwa yanyujije kuri Instagram, yashimiye abamushyigikiye n’abamubwiye amagambo amutera imbaraga nyuma y’amatora. Yavuze ko kuba yarabaye uwa gatatu mu bantu 54 bari bahatanye ari intsinzi kuri we, ndetse ko byamuhaye imbaraga zo gukomeza.

Yagize ati: “Ndashimira buri wese wampamagaye cyangwa wanyoherereje ubutumwa. Murakoze ku nkunga n’imbaraga mwampaye. Ntabwo nabashije kugera mu Nteko Ishinga Amategeko, ariko kuba narabaye uwa gatatu mu bakandida 54 ni intsinzi ndetse n’imbaraga zo gukomeza. Ndashimira Imana, ndakomeye kandi mfite icyemezo gikomeye cyo gukomeza. Sinzigera ncika intege. Urugendo rurakomeza.”

Aya magambo agaragaza ko kuri Samu Zuby, amatora atari iherezo ry’urugendo rwa politiki cyangwa urwo gukorera urubyiruko, ahubwo ari kimwe mu bice by'ubuzima ashaka gukuramo isomo.

Samu Zuby yari umwe mu bantu 54 bahataniye umwanya w’Umudepite uhagararira urubyiruko.

Kuba yarasoje ku mwanya wa gatatu, nubwo yabonye amajwi atandatu gusa, ni byo we yahisemo kurebamo uruhande rwiza rw'ibyavuye mu matora.

Ni umwanya utamuhaye intebe mu Nteko Ishinga Amategeko, ariko wamushyize mu bakandida batatu bagize amajwi menshi kurusha abandi muri iri rushanwa.

Kuri we, ibyo ni ikimenyetso cy’uko urugendo yatangiye rwo kwinjira mu bikorwa byo guhagararira no gukorera urubyiruko rutagomba guhagarara kubera ko atatsinze.

Nyuma y’uko ibyavuye mu matora bitangajwe, hari abibajije niba uwatsinze agomba kuba yararengeje 50% by’amajwi. Komisiyo y’Amatora yasobanuye ko muri aya matora hatari ngombwa ko umukandida agira cyangwa arenga 50% kugira ngo atsinde.

Mu butumwa yashyize kuri X, Komisiyo y’Amatora yavuze ko mu matora nk’aya, uwatowe ari umukandida warushije abandi amajwi, hashingiwe ku biteganywa n’Itegeko Ngenga rigenga amatora.

Ibi bisobanuye ko Niyonshuti Ben, wari imbere y’abandi bakandida mu majwi, ari we watsinze, nubwo atagejeje kuri 50%.

Bavuze bati “Ibisabwa mu gutanga kandidatire byaratangajwe, ariko wanabisanga mu Itegeko ngenga rigenga amatora mu ngingo yaryo ya 83. wareba  n'iya 90. Muri aya matora kandi uwatowe ni uwarushije abandi amajwi, ntiharebwa uwagize cyangwa warengeje 50% .”

Umunyarwenya Samu Zuby yagize amajwi 6 mu bantu 196 batoye bangana n’ijanisha rya 3%