Sinabasha kubana n'umuntu icyumweru cyose - Karole Kasita ku mpamvu atiteguye kurushinga

Mu kiganiro yagiranye na Galaxy FM, Karole yavuze ko nubwo yiyumva nk'umugore waba mwiza mu rugo, adateganya kurushinga vuba, bitewe n’uko abona ubuzima bwo kubana n’umukunzi butoroshye.

Yagize ati: “Nkunda umuntu umpa ituze, unyumva, akamenya kumpa umwanya igihe nywukeneye, ariko akaba ahari igihe nifuza ko tuba turi kumwe. Ariko si ngombwa ko duhora turi kumwe. Sinabasha kubana n’umuntu icyumweru cyose ngo tumare iminsi irindwi turi kumwe.”

Uyu muhanzikazi yagaragaje ko adashyigikiye igitekerezo cy’uko abashakanye baba hamwe buri munsi, avuga ko urukundo nyakuri rutagomba gushingira ku kuba abantu bahora begeranye.

Ati: “Hari ingo aho buri wese aba ukwe, ariko bagakundana byimbitse kurusha n’ababana umunsi ku wundi. Kuri njye, urukundo ni ibyiyumvo n'ubusabane, si ukubana gusa.”

Abajijwe impamvu adashaka, yasobanuye ko ari amahitamo ye bwite kandi ko nta kibazo cy’uko yaba yarabuze abamurambagiza. Ati: “Impamvu ntarashyingirwa ni uko ari amahitamo yanjye. Iyo nza kubishaka mba narashatse kera. Mfite ibisabwa byose byatuma mba umugore mwiza mu rugo, ariko mpisemo kutarushinga ubu.”

Karole Kasita ni umwe mu bahanzikazi bagezweho muri Uganda, azwi cyane mu ndirimbo nka Chekecha yakoranye n’abandi bahanzi barimo Vinka na Winnie Nwagi, Binyuma n’izindi nyinshi zatumye yigarurira imitima y’abakunzi ba muzika.

Karole Kasita yasobanuye impamvu atarashaka umugabo 

Yavuze ko atashobora kubana n'umuntu igihe kirekire