Uru ruzinduko rwabaye ku wa 5 Kanama 2026, ku munsi wa kabiri w’Inama Mpuzamahanga ya SIGNIS World Congress 2026, iri kubera i Kigali kuva ku wa 3 kugeza ku wa 8 Kanama 2026.
Ni inama yahuriyemo abanyamakuru, abahanga mu itumanaho n’abakora mu bitangazamakuru bya Kiliziya Gatolika bagera kuri 300 baturutse mu bihugu bisaga 40 byo ku migabane yose y’Isi.
Aba banyamwuga mu itangazamakuru basobanuriwe amateka yagejeje u Rwanda kuri Jenoside yakorewe Abatutsi, uburyo yashyizwe mu bikorwa, ingaruka zayo ku gihugu n’abaturage, ndetse n’uburyo Abanyarwanda bahisemo inzira yo kongera kubaka igihugu gishingiye ku bumwe, ubwiyunge n’amahoro.
Nk’uko tubikesha Kinyamateka, nyuma yo gusura uru rwibutso, bamwe mu bitabiriye iyi nama bagaragaje ko uru rugendo rwabahaye isomo rikomeye ku mbaraga itangazamakuru rifite mu kubaka cyangwa gusenya sosiyete.
Kudakwashe Martin Matambo, umunyamakuru wa Kiliziya Gatolika ukorera muri Zimbabwe akaba n’uharanira uburenganzira bwa muntu, yavuze ko amateka y’u Rwanda yabibukije uburemere bw’inshingano z’abanyamakuru.
Yavuze ko ibyo yabonye n’ibyo yasobanuriwe ku Rwibutso rwa Jenoside rwa Kigali byamweretse ububi bw’amakimbirane n’ingaruka z’urwango, ariko bikamwereka n’ubushobozi abantu bafite bwo kongera kubaka amahoro.
Yagize ati: "U Rwanda rwigishije Isi ko dushobora kwibuka ariko tugakira, tukongera kubaka igihugu. Nk'abanyamakuru ba Kiliziya, duhamagariwe kuvuga ukuri ariko tunatanga icyizere n’ubutumwa bw’ubwiyunge."
Matambo yavuze ko itangazamakuru rifite imbaraga zikomeye mu guhindura imyumvire y’abantu, bityo abanyamakuru bakwiye gukoresha ijwi bafite mu kurengera ubuzima n’agaciro ka muntu, aho gukwirakwiza ubutumwa bushobora guteza urwango n’amacakubiri.
Lustina Farcas wo muri Romania, ushinzwe urubyiruko, yavuze ko gusura Urwibutso rwa Jenoside rwa Kigali byamufashije gusobanukirwa amateka y’u Rwanda mu buryo burenze ibyo umuntu yumva mu bitabo cyangwa mu makuru.
Yavuze ko urugendo rw’u Rwanda nyuma ya Jenoside yakorewe Abatutsi, ari isomo ku bihugu byose byahuye cyangwa bishobora guhura n’amakimbirane.
Yagize ati: "Ibihugu byose bishobora kwigira ku rugendo rw’u Rwanda. Nubwo igihugu cyanyuze mu mateka akomeye cyane, cyashoboye kongera kwiyubaka. Ibyo bitwigisha ko n’ahari amateka mabi, bishoboka kongera kubaka ejo hazaza heza."
Farcas yasabye abanyamakuru cyane cyane abakiri bato kwirinda amakuru y’ibihuha n’imvugo zishobora gutera urwango, ahubwo bagaharanira ukuri no gukoresha itangazamakuru mu gukemura ibibazo bibangamiye sosiyete.
Perezida wa SIGNIS muri Afurika akaba n’Umuyobozi wa Komite Nyafurika yateguye SIGNIS World Congress 2026, Padiri Walter Ihejirika, yavuze ko gusura uru rwibutso byari kimwe mu bikorwa by’ingenzi byateguwe kugira ngo abanyamakuru bunguke amasomo azabafasha mu kazi kabo.
Yavuze ko kwibuka amateka ari ingenzi kuko bifasha abantu kuyigiraho no kwirinda gusubira mu makosa yakozwe kera.
Yagize ati: "Twabonye ko ari ingenzi gusura uru rwibutso kuko kwibuka ari ingenzi. Igitandukanya umuntu n’izindi nyamaswa ni uko ashobora kwibuka ibyabaye. Twibuka amateka si ukuguma mu bihe byahise, ahubwo ni ukwigira ku byabaye kugira ngo twubake ejo hazaza heza."
Padiri Ihejirika yavuze ko Kiliziya ihora ishyira imbere ubutumwa bw’urukundo, ubumwe n’ubuvandimwe, bityo uru ruzinduko rukaba rwafashije abitabiriye kumva neza ingaruka ziba iyo izo ndangagaciro zibuze.
Ati: "Iyo hari ubumwe, amahoro n’ubwuzuzanye, Jenoside ntishobora kubaho. Ni yo mpamvu turi hano, kugira ngo twigishe kandi twigire ku mateka."
Padiri Ihejirika yibukije abanyamakuru ko bafite inshingano ikomeye yo gukoresha ijwi bafite mu guhuza abantu aho kubatanya.
Yagaragaje ko insanganyamatsiko ya SIGNIS World Congress 2026 igira iti "Itumanaho rishingiye ku Ikoranabuhanga mu Guteza Imbere Ubumwe bw’Imico no Kurengera Ibidukikije", isaba abanyamwuga mu itangazamakuru gukoresha ikoranabuhanga mu guteza imbere ukuri, amahoro n’icyubahiro cya muntu.
Ati: "Tugomba kwirinda ikibi cyose cyatera urwango cyangwa amacakubiri mu mitima no mu muryango mugari. Ahubwo urukundo rw’Imana rugakomeze gukura no kubaka amahoro n’ubwiyunge."
Gusura Urwibutso rwa Jenoside rwa Kigali ni kimwe mu bikorwa by’ingenzi biri muri gahunda ya SIGNIS World Congress 2026, bigamije gufasha abanyamakuru n’abakora mu itumanaho gusobanukirwa uruhare rwabo mu kubaka sosiyete irangwa n’amahoro.
Abitabiriye iyi nama basoje uru ruzinduko bashimangira ko amateka y’u Rwanda ari isomo ku Isi yose ku buryo itangazamakuru rishobora kuba igikoresho cyo gukwirakwiza urwango cyangwa kuba umuyoboro wo kubaka ukuri, ubumwe n’ubwiyunge.