Mu myaka yashize, uyu munsi wabaye umwe mu minsi ikunzwe
cyane ku mbuga nkoranyambaga, aho usangwaho ubutumwa bwo gushimira inshuti
z'abakobwa, bashiki bacu, ba mama n'abandi bagore bagira uruhare rukomeye mu
buzima bwa buri munsi.
Inkomoko y'uyu munsi
Nk’uko bigaragara mu nyandiko yasohotse ku rubuga National Day
Calendal, inkomoko nyayo y'Umunsi wahariwe Incuti z'Abakobwa ntivugwaho rumwe.
Nta tegeko rya Leta cyangwa umuryango mpuzamahanga ryawushyizeho, ahubwo
watangiye nk'umunsi wihariye washyizweho n'abantu ku giti cyabo, nyuma ugenda
ukundwa n'abatari bake.
Amakuru akunze kwifashishwa agaragaza ko Allie Savarino
Kline na Sally Rodgers ari bo batangije uyu munsi mu mwaka wa 2006, bagamije
gushishikariza abagore gufata umwanya wo gushimira no kwizihiza inshuti zabo
z'abakobwa.
Hari n'indi nkuru ivuga ko Mistress Susan, wari ufite
urubuga rwa internet, yatangiye kuwizihiza muri 2004 agamije kugaragaza agaciro
k'ubucuti bw'abagore.
Icyakora, nta bimenyetso bihamye byemeza neza uwawutangije
bwa mbere, ari na yo mpamvu inkomoko yawo ikomeje kutumvikanwaho
n'abashakashatsi.
Kuki wizihizwa ku wa 1 Kanama?
Nta mpamvu yihariye y'amateka cyangwa umuco ituma wizihizwa
ku wa 1 Kanama. Iyi tariki yamenyekanye binyuze ku mbuga zitangaza iminsi
yihariye, nyuma abaturage n'ibigo bitandukanye batangira kuwizihiza buri mwaka
kugeza ibaye umuco mu bihugu byinshi.
Uyu munsi ntabwo uri mu minsi mpuzamahanga yemejwe
n'Umuryango w'Abibumbye (Loni), ahubwo ni umunsi umaze kwamamara bitewe
n'ubwitabire bw'abaturage n'imbuga nkoranyambaga.
Kuki wita ku "Bucuti bw’Abakobwa"?
Kimwe mu bintu abantu benshi bakunze kwitiranya ni
igisobanuro cy'ijambo "girlfriend".
Mu Cyongereza cyo hambere, iri jambo ryasobanuraga inshuti
y'umukobwa cyangwa y'umugore, atari umukobwa mukundana.
Nyuma y'aho, cyane cyane mu kinyejana cya 20, ryatangiye no
gukoreshwa risobanura umukobwa umuntu akundana na we.
Ni yo mpamvu uyu munsi washyiriweho mbere na mbere kwizihiza
ubucuti bw'abagore, nubwo muri iki gihe hari benshi bawukoresha bagaragaza
urukundo ku bakobwa bakundana na bo.
Uko wizihizwa
Mu bihugu byinshi, uyu munsi wizihizwa mu buryo
butandukanye.
Hari abagore n'abakobwa bahura bagasangira, bakajyana kunywa
ikawa, bagasohokana cyangwa bagahana impano nk'ikimenyetso cyo kwishimira
ubucuti bwabo.
Abandi bo bahitamo kohererezanya ubutumwa bwuje urukundo
n'ishimwe cyangwa gusangiza amafoto ku mbuga nkoranyambaga.
Ni umwanya kandi wo gushimira ba mama, bashiki bacu, abo
mukorana cyangwa abandi bagore babaye inkingi ya mwamba mu buzima bw'umuntu.
Impamvu washyizweho
Intego nyamukuru y'uyu munsi ni ukwibutsa abantu ko ubucuti
bw'abagore bugira uruhare rukomeye mu mibereho yabo.
Ubushakashatsi butandukanye bwagaragaje ko kugira inshuti
nziza bifasha umuntu kugira ubuzima bwiza bwo mu mutwe, kugabanya ihungabana
n'agahinda, no kongera ibyishimo n'icyizere.
Abatangije uyu munsi bashakaga ko nibura rimwe mu mwaka
abagore bafata umwanya wo gushimira abo bafitanye ubucuti no kubushimangira.
Uko imyaka yagiye ishira, ni bwo watangiye no gukoreshwa
n'abakundana bashimira abakobwa bakundana na bo, nubwo icyo atari cyo cyari
kigamijwe mu ntangiriro.
Umunsi ukomeje kwamamara
Muri iki gihe, Umunsi wahariwe Incuti z'Abakobwa ni umwe mu
minsi ukunzwe cyane ku mbuga nkoranyambaga, aho abantu bo hirya no hino ku Isi
basangizanya ubutumwa, amafoto n'amashusho agaragaza agaciro k'ubucuti
n'urukundo.
Nubwo utari umunsi mpuzamahanga wemewe n'amategeko, umaze
kuba umwanya wihariye wo kwibutsa abantu ko ubucuti nyabwo, cyane cyane hagati
y'abagore n'abakobwa, bugira uruhare rukomeye mu kubaka ubuzima burangwa
n'ibyishimo, ubufatanye no gushyigikirana.