Shizzo yisunze ‘Beat’ ya Kendrick Lamar, atanga gasopo ku bantu batatu bamuvugaho ibinyoma

Shizzo avuga ko yakoze iyi ndirimbo nyuma yo kurambirwa ibyo abo bantu batatu bagiye bamuvugaho, we abona ko ari ibinyoma bigamije kwangiza isura ye n'iy'umuryango we. Yemeza ko yahisemo kubasubiza akoresheje umuziki, abagezaho ubutumwa azi neza ko bashobora kumva.

Mu kiganiro yagiranye na InyaRwanda, Shizzo yavuze ko atari agishoboye kwihanganira uburyo amazina ye n'ay'abantu bo mu muryango we akomeza kuvugwa mu nkuru zitandukanye, zirimo ibyo avuga ko bidafite ishingiro.

Yagize ati: “Nta narimwe ikinyoma kizatsinda ukuri. Nta narimwe umwijima uzatsinda urumuri.”

Mu bihe bitandukanye, The Cat, Ddumba na Kasuku bagiye bagaruka ku buzima bwa Shizzo, by'umwihariko ku mubano we n'umugore we Kayitesi Yvonne uzwi nka Tessy.

Mu byo Shizzo atishimiye harimo inkuru zagiye zivuga ko yigeze kuvunika ubwo yari yagiye gushakisha ubuzima, izindi zikamugaragaza nk'umuntu ufite amadeni hirya no hino. Hanavuzwe amagambo yerekeye umugore we Tessy, aho bamwe bagiye banenga uburyo avuga ururimi rw'Icyongereza.

Shizzo abona ko ibyo bitari bikwiye gukomeza gufatwa nk'ibiganiro bisanzwe by'imyidagaduro, kuko we abifata nk'ibikorwa bigamije kwanduza izina rye no kwinjira mu buzima bwite bw'umuryango we.

Ni muri urwo rwego yahisemo gukora indirimbo “Igobe”, ayigira umwanya wo gusubiza abo bantu, agaragaza ko na we afite ubushobozi bwo kwifashisha amagambo mu kugaragaza uko abona ibyo bamukorera.

Mu buryo bw'ubutumwa, iyi ndirimbo igaragaza ko Shizzo atifuza gukomeza guceceka mu gihe yumva hari abamuvuga uko bishakiye, cyane cyane iyo ibyo bavuga bireba umuryango we.

Kugira ngo wumve neza igitekerezo kiri inyuma y'iyi ndirimbo, ni ngombwa kureba intambara y'amagambo yamaze igihe hagati y'abaraperi Kendrick Lamar na Drake, bombi bafite amazina akomeye mu muziki w'Isi.

Aba baraperi bari bamaze imyaka myinshi bagaragaza ko badacana uwaka, nubwo mu ntangiriro bari barakoranye indirimbo ndetse bakajya bafashanya mu bikorwa by'umuziki.

Mu mwaka wa 2013, Kendrick Lamar yatangiye kugaragaza ko adashaka gufatwa nk'umwe mu baraperi bahatanira umwanya wa mbere gusa. Ibi byagaragaye cyane mu murongo yaririmbye mu ndirimbo “Control” ya Big Sean, aho yagarutse ku baraperi batandukanye barimo Drake, agaragaza ko ashaka kubarusha.

Icyakora, amakimbirane yongeye gufata indi ntera mu 2023, ubwo Drake na J. Cole bakoranaga indirimbo “First Person Shooter”, bakagaragaza ko bo na Kendrick Lamar ari batatu mu baraperi bakomeye muri icyo gihe.

Kendrick ntiyanyuzwe n'icyo gitekerezo. Mu kwezi kwa Werurwe 2024, yifashishije indirimbo “Like That” ya Future na Metro Boomin, agaragaza ko atemera ko agomba gushyirwa mu itsinda ry'abantu batatu bahatanira kuba aba mbere, kuko we yumvaga ari ku rwego rwe bwite.

Ibyo byakurikiwe n'uruhererekane rw'indirimbo zo gushotorana hagati y'aba baraperi. Drake yashyize hanze “Push Ups” na “Taylor Made Freestyle”, Kendrick na we amusubiza mu ndirimbo zirimo “Euphoria”, “6:16 in LA” na “Meet the Grahams”.

Ku wa 3 Gicurasi 2024, Drake yashyize hanze “Family Matters”, Kendrick Lamar amusubiza mu gihe gito cyane akoresheje “Meet the Grahams”. Bukeye bwaho, ku wa 4 Gicurasi 2024, Kendrick yashyize hanze “Not Like Us”, indirimbo yakomeje gukurura abantu benshi kubera amagambo akomeye yamwibasiragamo Drake n'abantu bari hafi ye.

Iyi ndirimbo yakozwe ku njyana ya DJ Mustard, umwe mu batunganya imiziki bazwi muri Leta Zunze Ubumwe za Amerika. DJ Mustard yaje gutangaza ko yayikoze mu gihe cy'iminota igera kuri 30, kandi ko atigeze yumva indirimbo Kendrick yayikoreshejemo kugeza igihe yasohokeye.

“Not Like Us” yaje kuba imwe mu ndirimbo zikomeye mu mateka y'iyo ntambara y'amagambo, inafasha Kendrick Lamar kwegukana ibihembo bitanu muri Grammy Awards za 2025, birimo Igihembo cy'Indirimbo y'Umwaka n'icy'Indirimbo yanditswe Neza kurusha izindi.

Ni iyi nzira yo gusubiza abantu binyuze mu ndirimbo, aho gukomeza kubasubiza mu biganiro bisanzwe, bigaragara ko Shizzo yashatse kwiyegereza.

Mu guhitamo injyana ya “Not Like Us”, Shizzo ntiyagarukiye gusa ku gukoresha injyana ikunzwe, ahubwo yahisemo uburyo bw'umuziki bwamenyekanye mu guhangana n'umuntu cyangwa abantu ubonye ko bakuvuga mu buryo utishimiye.

Icyakora, hari itandukaniro hagati y'ibibazo Kendrick Lamar yari afitanye na Drake n'ibyo Shizzo avuga ko yahuye na byo. Kendrick yari mu guhangana kwagutse gushingiye ku guhatana mu muziki, mu gihe Shizzo avuga ko ikibazo cye ahanini gishingiye ku magambo ajyanye n'ubuzima bwe bwite n'umuryango we.

Kuba yarahisemo kwifashisha iyo njyana, ni uburyo bwo kugaragaza ko atagishaka gukomeza kurebera mu gihe yumva hari abamuharabika, ahubwo ko na we ashaka kugira ijambo mu biganiro bimuvugwaho.

Mu kiganiro na InyaRwanda, yashimangiye ko impamvu nyamukuru yamusunitse gukora “Igobe” ari uko yari amaze kurambirwa ibinyoma avuga ko The Cat, Ddumba na Kasuku bamuvugaho.

Iyi ndirimbo ije mu gihe Shizzo n'umugore we Tessy bakomeje kugarukwaho mu itangazamakuru ry'imyidagaduro, haba ku mubano wabo, ubuzima bwabo ndetse n'ibindi bibazo bijyanye n'ibyo bagiye bavuga ku mbuga nkoranyambaga.

Shizzo agaragaza ko adashaka ko ibivugwa ku muryango we bikomeza gufatwa nk'ukuri bitabanje kugenzurwa, ari na yo mpamvu yahisemo kubisubiza akoresheje igihangano cye.

Bityo, “Igobe” si indirimbo nshya gusa mu rugendo rw'umuziki rwa Shizzo, ahubwo ni n'uburyo yahisemo gukoresha umuziki nk'intwaro yo kurengera izina rye, ashimangira ko atazemera guhora acecetse mu gihe yumva hari abamuvuga uko bishakiye.

Shizzo yashyize hanze indirimbo “Igobe”, asubiza The Cat, Ddumba na Kasuku avuga ko bamaze igihe bamuvugaho ibinyoma bigamije kwangiza izina rye n'iry'umuryango we

KANDA HANO UBASHE KUMVA NEZA IYI NDIRIMBO SHIZZO YISE ‘IGOBE’