Sherrie Silver yakusanyije arenga Miliyoni 20 Frw mu birori bye

Mu birori byihariye byateguwe ku bw’umuryango yashinze, Sherrie Silver Foundation, byabaye mu ijoro ryo kuri uyu wa Gatandatu tariki 1 Ugushyingo 2025 muri BK Arena, uyu mukobwa w’umunyarwandakazi wubatse izina ku rwego mpuzamahanga yahurije hamwe inshuti ze n’abafatanyabikorwa, bamufasha gukusanya inkunga yo gufasha abana batishoboye.

Mu buryo bw’amateka, Sherrie Silver yifashishije “auction” — uburyo bwo kugurisha ibintu bihari ariko hagamijwe gukora ibikorwa by’urukundo. Uhereye ku myenda, amajoro yo mu mahoteli y’icyubahiro kugeza ku rugendo rwo gusura ingagi, buri kimwe cyashyizwe mu cyamunara cyari gifite isura y’ubugiraneza.

Mu gihe abashyitsi bari bategereje umuziki n’akanyamuneza, amaso yose yari ku byagurishwaga n’ukuntu ibiciro byari kuzamuka mu buryo butunguranye.

Mu byagaragaye nk’ibyishimo by’ikirenga, Miss Mutesi Jolly ni we wazamuye urusaku mu cyumba ubwo yakuraga mu cyamunara umwenda w’Ikipe ya Paris Saint-Germain (PSG) wasinyweho n’abakinnyi bayo.

Uyu mwenda wari watangiye kugurishwa ku madolari 700, ariko byarangiye Miss Jolly atanze $1000 (asaga 1,430,000 Frw), atsinda abawushakaga. Abari aho bamuhaye amashyi y’urufaya, nk’ikimenyetso cy’uko ubwitange bwe bwakoze ku mitima.

Si Jolly wenyine wagize umutima wo gufasha. Muri iryo joro, hatanzwe amafaranga atari make ku bindi bintu byagurishwaga:

$2000 – Amafaranga yatanzwe n’uwaguze ijoro rimwe muri Hotel yo mu rwego rwo hejuru. $1800 – Amafaranga yatanzwe ku ijoro ryo kurara muri Hoteli yo mu Kiyovu. $850 – Amafaranga yatanzwe ku majoro abiri yo kurara muri Hoteli yo ku Kibuye. $2900 – Amafaranga yatanzwe ku rugendo rwo gusura ingagi. $1200 – Undi yatanze aya ku kindi gikorwa cy’urukundo.

Itike y’indege ya Brussels Airlines – nayo yagurishijwe mu cyamunara.

Iyo uteranyije amafaranga yose yatanzwe mu cyamunara nk’uko bigaragara hejuru: $2000 + $1800 + $850 + $2900 + $1200 + $1000 = $9750

Ni ukuvuga ko Sherrie Silver yakusanyije amadorali 9,750, angana n’arenga Miliyoni 20 n’ibihumbi 700 by’amafaranga y’u Rwanda (20,700,000 Frw), hakiyongeraho andi yaturutse ku itike y’indege n’andi yatanzwe n’abitabiriye batigeze batangazwa ku mugaragaro.

Mu ijambo rye, Sherrie Silver yavuze ko “Icyiza ni uko abantu bifatanyije natwe kugira ngo abana benshi babone icyizere cy’ubuzima. Ndashimira buri wese witanze n’ababikoze bafite umutima wo gufasha.”

Yongeyeho ko aya mafaranga azifashishwa mu bikorwa by’uburezi, ubuzima n’imibereho myiza y’abana batishoboye bafashwa n’umuryango we.

Mu gihe abari aho basohokaga bafite ibyishimo ku maso, Sherrie Silver yagaragaye ashimira buri wese wamufashije, ashimangira ko ibikorwa nk’ibi bizajya bikorwa kenshi kugira ngo urukundo rutazagabanuka.

Iri joro ryasize isomo rikomeye: ko imbyino, imideli n’itumanaho byiza bishobora kuba urufunguzo rwo guhindura ubuzima bw’abandi.

Sherrie Silver yongera kwandika izina rye mu mitima y’abanyarwanda, atari nk’umubyinnyi wabiciye bigacika muri “This Is America”, ahubwo nk’umunyadufasha wateye intambwe mu guteza imbere urukundo n’ineza.

Sherrie Silver ashimira abatanze inkunga, nyuma yo gukusanya arenga Miliyoni 20 Frw mu cyamunara cy’urukundo

Sherrie Silver yambaye uburanga n’icyizere – ijoro ry’urukundo n’ubugiraneza muri The Silver Gala

Umubyinnyi mpuzamahanga w’umunyarwandakazi, Sherrie Silver yinjiranye isura y’umutima ufasha, byose ku nyungu z’abana bo muri Sherrie Silver Foundation

UKO BYARI BYIFASHE MBERE Y'IBIRORI BYA THE SILVER GALA