Sherrie Silver, Alyn Sano, Jean Luc na Clarisse mu banyarwanda bari kuryoherwa igikombe cy’Isi cya 2026

Kuva tariki ya 11 z’uku kwezi kuzageza tariki ya 19 z’ukwezi gutaha kwa karindwi muri Leta Zunze Ubumwe za Amerika, Canada na Mexico harimo harabera imikino y’igikombe cy’Isi cya 2026.

Ni irushanwa riba ryahagurukije Isi yose dore ko riba ryahuje ibihugu byo ku migabane itandukanye,imico itandukanye ndetse rigahuza umupira w’amaguru n’imyidagaduro.

Abafana baturutse hirya no hino bari muri Leta Zunze Ubumwe za Amerika, Canada na Mexico aho bagiye gushyigikira ibihugu basanzwe bafana kuri stade no kwihera ijisho abakinnyi basanzwe bakunda. Muri abo harimo n’Abanyarwanda.

Mu minsi ishize, umubyinnyi mpuzamahanga akaba n’umukinnyi wa filime, Sherrie Silver abinyujije ku mbuga nkoranyambaga yerekanye ko yarebye umukino wahuje ikipe y’igihugu ya Portugal na Repubulika Iharanira Demokarasi ya Congo warangiye banganya 1-1 kuri NRG Stadium i Texas muri Amerika.

Yerekanye ko ari ibyishimo kuba yararebye Cristiano Ronaldo n’amaso ye nyuma y’uko yakuze amufana. Yanasangije amashusho abamukurikira ari kumwe na Alyn Sano wataramiye abafana barebye umukino wa Portugal na Congo hanze ya Stade.

Ntabwo ari aba gusa baryohewe n’imikino y’igikombe cy’Isi cya 2026 dore ko na Uwimana Clarisse na Imfurayacu Jean Luc basanzwe ari abanyamakuru kuri B&B Kigali FM, bari bari gukurikira 'Live' imikino y'igikombe cy'Isi.

Imfurayacu Jean Luc yari ku mukino Morocco yanganyijemo na Brazil 1-1 kuri MetLife Stadium i New Jersy muri Leta Zunze Ubumwe za Amerika. Yarebye kandi umukino w'u Bufaransa bwatsinzemo Senegal ibitego 3-1 nabwo kuri MetlLife Stadium i New Jersy.

Ku wa Gatatu w'iki Cyumweru, yarebye umukino wa Portugal na Repubulika Iharanira Demokarasi ya Congo aho warangiye banganya 1-1. Ni umukino wabereye kuri NRG Stadium i Texas muri Amerika. Uwimana Clarisse we yarebye umukino wa Portugal na Congo kuri NRG Stadium i Texas muri Amerika.

Aba banyarwanda bose bagiye bagaragaza amarangamutima yabo ko bishimye mu buryo budasanzwe bijyanye n'uko barimo barabona amaso ku maso abakinnyi bakuze bakunda. Hari n'abandi Banyarwanda barimo barareba iyi mikino y'igikombe cy'Isi cya 2026 kuri sitade, gusa biganjemo ababa muri ibi bihugu biri kuberamo Igikombe cy'Isi cya 2026.