Shakira, Burna Boy na Tyla batanze ibyishimo bisendereye mu itan

Ibirori byo gutangiza iri rushanwa byaranzwe n’imbyino zigaragaza umuco wa Mexico, amabara menshi n’abahanzi bakomeye ku rwego mpuzamahanga. Shakira ni we wari ku isonga, afatanyije na Burna Boy mu kuririmba indirimbo y’Igikombe cy’Isi 2026 yitwa “Dai Dai”, yakiriwe n’imbaga y’abafana yari yuzuye stade.

Abandi bahanzi baririmbye muri ibyo birori barimo J Balvin, Danny Ocean, Tyla ndetse n’itsinda rya muzika rya Mexico Maná. FIFA yari yateguye ko umuco wa Mexico ugaragazwa binyuze mu mbyino, ubuhanzi n’imyambarire gakondo.

Nubwo imbere muri stade hari ibyishimo byinshi, hanze yayo hari umwuka utari mwiza. Amatsinda y’abigaragambya yasabaga ko hakumvwa ikibazo cy’ababuriwe irengero mu ntambara yo kurwanya ibiyobyabwenge muri Mexico.

Raporo zitandukanye zagaragaje ko habaye ugushyamirana hagati yabo na polisi, bituma ahantu hamwe hafungwa by’agateganyo kugira ngo umutekano ucungwe neza.

Ku kibuga, ikipe y’igihugu ya Mexico yahaye ibyishimo abafana bayo itsinda South Africa ibitego 2-0 mu mukino wafunguye iri rushanwa. Intsinzi yakurikiwe n’ibirori bikomeye mu bafana bari buzuye stade

Ku ruhande rw’abahanzi, Tyla na we yagaragaye muri ibi birori aho yaririmbye mbere y’umukino, ndetse FIFA yatangaje ko azongera kugaragara mu birori bizabera i Los Angeles mu minsi ikurikira, hamwe n’abahanzi barimo Katy Perry, Future, Lisa na Anitta.