Ibi bibaye nyuma y'imyaka ibiri n'igice urukiko rwa mbere rubagize abere kuri ibyo byaha. Iyi dosiye yari ishingiye ku kwishyurwa kwa miliyoni ebyiri z'amafaranga y'Abasuwisi (hafi miliyoni 2.21 z'amadolari y'Amerika) Blatter yahaye Platini mu mwaka wa 2011.
Ubushinjacyaha bwavugaga ko ubwo bwari uburiganya, ariko Blatter na Platini bavuze ko ayo mafaranga yari ubwishyu bw'akazi ko kugirwa inama Platini yakoze hagati ya 1998 na 2002, hashingiwe ku masezerano yo mu magambo.
Nyuma y'iki cyemezo, Michel Platini yatangaje ko yishimiye cyane kuba yaragaruriwe icyubahiro cye nyuma y'imyaka icumi y'ibirego byamuhungabanyije. Yavuze ko ubu agiye kwizihiza iki cyemezo hamwe n'inshuti ze.
Sepp Blatter na we yagaragaje ko anyuzwe n'iki cyemezo, avuga ko iyi dosiye yamubereye nk'inkota ya Damocles mu myaka icumi ishize.
Nubwo bagizwe abere, ubushinjacyaha bw'Ubusuwisi bwatangaje ko bugitekereza ku kuba bwakongera kujurira. Ibi bivuze ko iyi dosiye ishobora gukomeza, bitewe n'icyemezo cy'ubushinjacyaha.
Iyi dosiye yatumye haba impinduka zikomeye mu buyobozi bwa FIFA na UEFA, aho Blatter na Platini bahagaritswe mu bikorwa bya ruhago mu 2015 kubera ibi birego, bikaba byaranagize ingaruka ku mikorere y'aya mashyirahamwe yombi.
Michel Platini
Sepp Blatter