Senderi yanyuze ibihumbi by’abaturage muri Nyagatare na Gatsibo –AMAFOTO

Kuva yatangira uru rugendo rwo kwizihiza imyaka 20 amaze mu muziki, Senderi yagaragaje ko intego ye atari ugutera imbere wenyine, ahubwo ari ugusangira umunezero n’abamushyigikiye kuva kera.

Ku wa Gatanu tariki ya 24 Ukwakira 2025, uyu muhanzi wamenyekanye mu ndirimbo nka ‘Nzabibvuga’, ‘Muri Hehe’, ‘Twaribohoye’, ‘Nta Cash’ n’izindi nyinshi, yataramiye mu murenge wa Rukomo mu Karere ka Nyagatare.

Ku munsi wakurikiyeho, kuwa Gatandatu tariki 25 Ukwakira 2025, yakomereje i Ngarama mu Karere ka Gatsibo, aho yasusurukije imbaga y’abakunzi be mu gitaramo cyaranzwe n’ibyishimo, urwenya n’amagambo yuje urukundo rw’igihugu.

Uyu mushinga wo kwizihiza imyaka 20 mu muziki uzamugeza mu turere 12 mu gihugu hose — igikorwa giteye amateka kuko kizaba gitumye aba umuhanzi wa mbere mu Rwanda wigeze gutaramira mu turere twose uko ari 30.

Senderib yabwiye InyaRwanda ati “Nashatse gusubira aho byose byatangiriye. Ntabwo byari ngombwa ko mbikorera i Kigali gusa. Abanyarwanda bose ni bo banjyanye aho ndi uyu munsi, rero ndashaka ko bose babyumva.”

Yongeraho ko iyi gahunda ayifata nk’ “urugendo rwo gushimira Imana n’Abanyarwanda bose bamuhaye urubuga rwo gukoresha impano ye.”

Kuri ubu, nyuma yo gutaramira mu turere 18, aracyateganya gukomereza mu dusigaye 10, aho azasoza urugendo rwe rw’imyaka 20 mu muziki rugamije kugaragaza ko umuziki nyarwanda ushobora kugera kuri buri wese, aho ari hose mu gihugu.

Mu myaka 20 amaze mu muziki, Senderi Hit yabaye umwe mu bahanzi bafite indirimbo zifite ubutumwa bubaka. Akenshi yagiye akoresha injyana y’Afrobeat n’iza gakondo zifite umudiho wihariye w’u Rwanda.

Yaririmbye kuri ghunda z’Igihugu, abahanzi n’imibereho isanzwe, ari nabyo bituma indirimbo ze zisanga benshi mu buryo bworoshye.

Ati “Iyo ndirimbye, sinshaka gusa ko abantu babyina. Nshaka ko basohoka bafite icyo bungutse. Niba ari uguseka, baba bakize umunaniro. Niba ari indirimbo y’ubutumwa, baba bungutse isomo.”

Uru rugendo rwo kwizihiza imyaka 20 ruzasozwa mu mpera z’umwaka wa 2025, nyuma yo gusura uturere 10 dusigaye. Senderi avuga ko azarangiza ataramye mu gitaramo gikomeye cy’i Kigali, aho azatumira bagenzi be bo mu myaka inyuranye.

Ati “Ndasoza nshimira Imana kuko niyo yampaye impano. Abafana bo ni abanjye burundu. Icyo mbizeza ni uko nzakomeza kubahesha ishema, kandi nkomeza kuririmba ibivuga ku Rwanda n’Abanyarwanda.”

Mu gihe abahanzi benshi bibanda ku gukora indirimbo nshya, Senderi yahisemo gusubira mu mizi, aho umuziki we wakuze. Uru rugendo rwe rw’imyaka 20 ntabwo ari urw’umuhanzi watsinze, ahubwo ni urw’umunyabigwi wemeje ko ubuhanzi bw’ukuri bukorwa ku mutima, si ku rubuga rwa YouTube gusa.

Senderi Hit mu rugendo rwo kwizihiza imyaka 20 mu muziki – Aho byose byatangiriye, niho agarukiyemo 

Senderi yasusurukije abaturage ba Nyagatare mu gitaramo cy’ibihe byiza n’ubutumwa bw’urukundo rw’u Rwanda 

Nyuma ya Rukomo, Ngarama yabyiniye ku ndirimbo z’inkoramutima zaranze urugendo rwa Senderi mu myaka 20 ishize 

Urugendo rwa Senderi rwamaze kugera mu turere 18 – intego: kuba umuhanzi wa mbere utaramiye mu turere twose tw’u Rwanda

 Abaturage ni bo banjyanye aho ndi uyu munsi, ni bo nshimira uyu munsi.” – Senderi International Hit

Imyaka 20 y’umuziki wubaka, usetsa, unyura imitima y’Abanyarwanda bose – Senderi aracyari kuri ‘stage’ nkaho ari ejo

Abanya-Gatsibo baririmbanye na Senderi mu gitaramo cyahinduye umujyi wabo urusengero rw’umunezero 

Senderi ashobora kuba ari we muhanzi wa mbere uzasiga amateka yo gutaramira mu turere twose tw’u Rwanda 

Ntabwo ari umuziki gusa, ni ishimwe ryo gushimira Imana n’Abanyarwanda.” – Senderi Hit mu rugendo rw’imyaka 20 mu muziki