Senateri Mukabalisa Donatille yaguye mu Bitaro Byitiriwe Umwami Faisal i Kigali, aho yari amaze igihe yitabwaho n'abaganga. Amakuru y'urupfu rwe yamenyekanye mu gitondo cyo kuri uyu wa Kane, mu gihe bamwe mu bo bakoranaga mu Nteko ya Sena bavuze ko bari baherutse kumusura aho yari arwariye.
Mukabalisa Donatille yitabye Imana ku munsi yavukiyeho, aho kuri iyi tariki 30 Nyakanga 2026 yari kuba yujuje imyaka 66 y'amavuko. Yyavukiye i Nyamata mu Karere ka Bugesera muri Nyakanga 1960. Mbere yo kwinjira muri politiki, yakoze umwuga wo kwigisha amategeko muri Kaminuza Yigenga ya Kigali (ULK).
Yanakoranye n'Imiryango y'Abibumbye, harimo Ishami ry'Umuryango w'Abibumbye ryita ku Buzima (OMS/WHO) n'Ishami ryita ku Iterambere (UNDP), aho yamaze imyaka 16 akora ibikorwa bitandukanye.
Yatangiye kuba Umudepite mu 2003, akomeza uwo murimo kugeza mu 2008. Mu 2011 yagizwe Umusenateri, mbere yo kongera gutorerwa Inteko Ishinga Amategeko umutwe w'Abadepite mu 2013.
Kuva mu 2013 kugeza mu 2024, yayoboye umutwe w'Abadepite nka Perezida wawo. Nyuma y'iyo manda, ntiyongeye kwiyamamaza kuko yari yararangije manda ebyiri zemewe n'amategeko muri uwo mwanya. Hon. Mukabalisa yari Perezida w'Ishyaka Riharanira Ukwishyira Ukizana kwa Buri Muntu (PL).
Urupfu rwa Senateri Donatille Mukabalisa rusigiye u Rwanda umwe mu bayobozi bagize uruhare rukomeye mu kubaka inzego z'imiyoborere, guteza imbere ihame ry'uburinganire no gukomeza kwimakaza imikorere ishingiye ku mategeko. Azahora yibukirwa ku musanzu we mu buzima bwa politiki n'iterambere ry'igihugu.
Senateri Mukabalisa Donatille yitabye Imana ku myaka 66 y'amavuko azize uburwayi