Sarah Akinyi waserukanye ‘Umushanana’ yegukanye ikamba rya Miss Commonwealth Kenya –AMAFOTO

Yambitswe iri kamba mu birori bikomeye byabaye ku wa 13 Nzeri 2025 byabereye muri Villa Rosa Kempinski, byahuriyemo urubyiruko rw’ingeri zose rwo mu Karere k’Afurika y’Iburasirazuba, byahuje ubuyobozi mu nzego zinyuranye, abakora ibikorwa by’ubugiraneza n’iterambere ry’abakobwa bo mu bihugu bya ‘Commonwealth’.

Mu kiganiro yagiranye na InyaRwanda, Sarah Akinyi yasobanuye impamvu yaserukanye yambaye umwambaro w’u Rwanda. Agira ati “Nahisemo kwambara umushanana kubera ko inkuru y’u Rwanda inyegereye cyane; igihugu cyashoboye kuzamuka nyuma y’ibihe bikomeye binyuze mu bumwe n’ubwiyunge.”

“Urugendo rw’u Rwanda rwo kugaragaza imbaraga z’ubumwe, kwihangana, no kwishyira hamwe ni indangagaciro nkunda cyane. Umwambaro ubwawo ugaragaza ubwiza, icyubahiro, n’ishyirwa hejuru ry’umuco, ibyo byose nashakaga kugaragaza ku rubyiniro.”

Sarah Akinyi yakomeje avuga uburyo yagenzuye neza ko umwambaro ugaragaza umuco nyarwanda ku buryo bwiyubashye. Avuga ati “Kugira ngo umwambaro ube nyawo, nakoze ubushakashatsi bwimbitse ku mateka y’u Rwanda, nkahuza n'imyenda hano muri Kenya, kandi nkoresheje abacuruzi b’inzobere mu gukora imyambaro ku buryo bwihariye.”

Yungamo ati “Nanashyizemo amabara y’Idarapo y’Igihugu cy’u Rwanda mu mwambaro kugira ngo nubahishe indangagaciro n’umurage w’iki gihugu. Byari ingenzi kuri njye ko umwambaro utagaragara neza gusa, ahubwo unagaragaza icyubahiro n’umuco w’u Rwanda.”

Uyu mwambaro wa Kinyarwanda, ‘Umushanana’, wihariye mu gutuma Sarah Akinyi atandukana n’abandi bitabiriye irushanwa, bityo agira isura idasanzwe ku rubyiniro no mu maso y’abagenzuzi b’amarushanwa.

Ku bijyanye n’ikamba yegukanye n’uburyo yabyakiriye, Sarah Akinyi yagize ati “Nishimiye cyane kugirwa Miss Commonwealth Kenya 2025; ikamba ridahagarariye gusa ubwiza, ahubwo rinagaragaza ubuyobozi, serivisi, no gushyigikira ibikorwa by’ubugiraneza.”

Uyu mukobwa yavuze ko “Uru rugendo rwari rwihariye kandi rwampaye amasomo menshi; rwananyigishije byinshi kandi rwanshimangiye guhanga udushya no gusohoka mu mwanya wanjye w’akaruhuko.”

Yanavuze ko yashoboye guhura n’abantu b’ikitegererezo bo mu bihugu bya Commonwealth “bikazamfasha mu guharanira impinduka nziza mu muryango wanjye no hanze yawo.”

Ikamba rya Miss Commonwealth Kenya riherekejwe no kuba ambasaderi w’umuco, ubugiraneza n’iterambere ry’urubyiruko, ibintu Sarah Akinyi yiyemeje kuzamura no gushyigikira mu Rwanda no muri Kenya.

Muri ibi birori, Ambasaderi wa Zambia muri Kenya, Musemuna niwe washyikirije ibihembo Miss Sarah Akinnyi. Uyu mukobwa yagaragiwe na Beryl Mungai wabaye igisonga cya Mbere, ndetse na Sally Quinter wabaye igisonga cya Kabiri.

Sarah Akinyi yagaragaye ku rubyiniro afite umushanana ugaragaza ubwiza, icyubahiro n’umuco nyarwanda, ndetse yerekana ko kwishyira hamwe n’indangagaciro by’umuco bishobora kuba isoko y’icyubahiro n’ishimwe ku rwego mpuzamahanga.

Mu butumwa bwe ku rubyiruko, Sarah yavuze ko kwiyubaka no kumenya imico itandukanye ku isi bifite akamaro mu iterambere ry’umuntu ku giti cye no ku muryango nyarwanda ndetse n’uw’isi yose muri rusange. Yanasabye abakobwa kwiyitaho no kwitinyuka mu marushanwa nk’aya, ariko kandi bakagaragaza icyubahiro n’ubumuntu muri byose bakora.

Sarah Akinyi [Ubanza ibumoso] yambitswe ikamba rya Miss Commonwealth Kenya 2025, aha ari kumwe n’ibisonga bye bibiri

Sarah Akinyi yasobanuye ko yaserukanye umushanana ku rubyiniro, kugirango agaragaze ubwiza n’icyubahiro cy’umuco nyarwanda

Ambasaderi wa Zambia muri Kenya, Musemuna ashyikiriza ibihembo Sarah wahigize bagenzi be muri iri rushanwa ryabereye mu gihugu cya Kenya