Sandra Teta agiye kuyobora ibirori by'umuco bizahuriramo Abanyarwanda batuye muri Uganda

Iki gikorwa cyateguwe hagamijwe guhuza no guha urubuga imiryango y’Abafumbira, Abanyarwanda n’Abarundi batuye muri Uganda. Ni ijoro rizaba ririmo umuziki, imbyino n’umuco, bikazagaragaza umuco usangiwe n’iyo miryango itatu. Ababiteguye bavuga ko kwitabira iri serukiramuco bizaba ari umwanya wo kugaragaza ubumwe no kwishimira umuco gakondo.

Kuba Sandra Teta ari we uyoboye iki gikorwa byitezweho kongera umubare w'abazitabira, kuko azwiho ubuhanga mu kuyobora ibirori ndetse n’icyizere afite mu bantu, by’umwihariko mu rubyiruko rwibona mu byo akora. Byitezwe ko iri serukiramuco rizaba rifite umwihariko wo guhuza ibyishimo n’icyubahiro gikwiye guhabwa umuco, bikanagira uruhare mu kongera gukundisha urubyiruko imico y’iwabo.

Abariteguye bamaze gutangaza ibiciro by’amatike: ibya rusange ni amafaranga 20,000 ya Uganda, VIP ni 50,000, ameza y’abantu bane 600,000 naho ameza y’abantu umunani akagurwa miliyoni imwe. Bateganya ko abantu bazitabira ari benshi, kuko igikorwa cyatangiye kugarukwaho cyane ku mbuga nkoranyambaga ndetse kikaba gifite umwihariko w’imyidagaduro n’umuco.

Ibi bitangajwe nyuma y'uko Sandra Teta yongeye kugaragara ari kumwe n’umukunzi we Weasel Manizo, nyuma y’icyumweru cyari gishize habayeho intonganya zikomeye zashoboraga no kumutwara ukuguru.

Mu cyumweru cyashize, bombi bagiranye amakimbirane yabereye mu kabari ko muri Kampala, aho bivugwa ko Sandra yagongesheje Weasel imodoka ye.

Ibinyamakuru birimo Big Eye na Howwe.Ug byanditse ko Polisi ya Uganda yatangaje ko ayo makimbirane yari akomotse ku byari bimaze icyumweru cyose byari hagati yabo mu rugo, bikarangirira mu ruhame. Abafana ba Weasel bararakaye cyane, bibaza impamvu urukundo rw’aba bombi rukomeje kurangwa n’amakimbirane n’amahane mu maso y’abantu.

Nyuma y’uko ibintu bituje, ndetse hakiyongeraho ubuvugizi bwa Jose Chameleone, mukuru wa Weasel, hateguwe inama y’umuryango yahuje impande zombi kugira ngo baganire.

Muri iyo nama, Sandra yagaragaje kwicuza ku byabaye, yemera ko byaturutse ku burakari bukabije bwamurenze. Weasel, nk’umukunzi uzi kubabarira, yakiriye imbabazi ze maze bombi batangira kwibanda ku gukira kwe.

Ibi byabaye intandaro yo guteza impaka nyinshi mu bafana no mu bantu batandukanye, benshi bibaza ku mubano w’aba bombi umaze igihe utavugwaho rumwe kubera akajagari gakunze kuwuranga. Nyamara amashusho yakwirakwijwe ku mbuga nkoranyambaga agaragaza ko aba bombi bongeye kwiyunga.

Muri ayo mashusho, Sandra Teta agaragara yitaho Weasel wari ukigendera mu kagare, anacumbagira, mu rugo rwabo ruherereye i Makindye–Kizungu muri Kampala, bikaba bigaragaza ko bongeye gusubirana.

Hashize imyaka myinshi bivugwa ko Weasel na Sandra bakunze kugirana amakimbirane adashira, ariko kenshi bagakomeza kongera kwiyunga no gukomezanya mu rukundo rwabo.

Sandra Teta agiye kuyobora ibirori by'umuco muri Uganda

Ni ibirori bizahuza abantu batandukanye barimo n'Abanyarwanda batuye muri Uganda

Ibi bibaye nyuma y'igihe gito yumvikanye mu bibazo bikomeye n'umukunzi we, Weasel Manizo