Mu gitondo cyo kuri uyu wa kabiri tariki 11 Ukwakira 2016 nibwo Perezida w’u Busuwisi J N Schneider Ammann yahuye n’amakompanyi mato akirimo kuzamuka 30 aturutse ku isi hose. Ni kompanyi ziri mu byiciro binyuranye birimo:Ikoranabuhanga mu by’amafaranga, ikoranabuhanga ry’ama ‘Robots’,… Umugabane wa Africa uhagarariwe na MERGIMS yashinzwe n’umunyarwanda Muhire Louis Antoine.
Izi kompanyi zatoranyijwe mu zindi 850 zari ziri guhatanira kwinjizwa muri gahunda ya ‘kickstart accelerator’ yateguwe n'ikigo cyo mu Busuwisi gishinzwe guteza imbere kompanyi nto zikiri kwiyubaka. Uretse guhugura no kongerera ubumenyi izi kompanyi zatorayijwe, ‘kickstart accelerator’ izanafabafasha gutegura neza icyerekezo, kubahuza n’abashoramari no kubaha ubufasha (mentoring). Iyi gahunda yatangijwe tariki 21 Kanama 2016, ikazamara ibyumweru 11. Kugeza ubu abatoranyijwe bamaze guhugurwa n’ibigo bikomeye birimo google ,credit swisse,ubs,swiss life n’ibindi.
Umunyarwanda yahawe amahirwe yo gusobanura umushinga we imbere ya Perezida w’Ubusuwisi
Mu gihe izi kompanyi zimaze mu Busuwisi, 3 zarushije izindi kwitwara neza nizo zahawe amahirwe yo gusobanura imishinga yabo imbere ya J N Schneider Ammann , Perezida w’u Busuwisi. MERGIMS ni umwe murizo ari nayo mpamvu Muhire Louis Antoine yahawe aya mahirwe yo gusobanura ibyerekeye kompanyi yashinze.
Mu kiganiro yagiranye na inyarwanda.com, Muhire yavuze ko yishimiye kubasha kugaragaza ko u Rwanda rumaze gutera intambwe mu ikoranabuhanga kandi ko iterambere ryarwo rikataje. Ati «Kuba byonyine aritwe duhagarariye umugabane wa Afurika ni ishema rikomeye. Nasobanuye umushinga wacu kandi bawishimiye kuko ushobora gufasha abantu benshi ku isi hose. »
Perezida w’Ubusuwisi ngo bamubwiye ko u Rwanda ari ‘Ubusuwissi bwa Africa’
Muhire yongeyeho ko iyi gahunda izabafasha cyane ndetse n’u Rwanda rukahungukira. Ati « Nkatwe hari ama sosiyete abiri akomeye cyane aha turimo kuganira gukorana. Nibikunda rero u Rwanda ruzavanamo ‘investment’ nini izahita ijya muri ICT sector kandi igaha akazi umubare munini w’urubyiruko. »
Ajya gushinga MERGRIMS, Muhire yafashe icyemezo cyo kureka akazi kamuhembaga neza muri Canada, aza mu Rwanda mu rwego rwo gufasha Abanyarwanda gukoresha ikoranabuhanga mu kwishyura ibintu bitandukanye, bijyanye na gahunda ya Leta yo guteza imbere ikoranabuhanga mu bukungu.
Mu kiganiro cyihariye yagiranye na Perezida w’u Busuwisi, ngo yamubajije impamvu yavuye muri Canada, agahitamo kuza mu Rwanda kuhakorera umushinga we. Muhire yamusubije ko ariho yabonaga uyu mushinga wakora neza.
Yanamubajije uko mu Rwanda byifashe. Ati « Yanambanije uko i Rwanda byifashe ,ngo ko yumva ko turi Ubusuwisi bwa Africa, nanjye nti nibyo koko bikaba arinabyo byatumye ntaha nyuma y’imyaka 21 mba muri Canada kandi nari mpafite akazi keza. »
Amubajije icyo abona azungukira mu Busuwisi, Muhire yamusubije ko nibishoboka bakabasha gusinyana amasezerano na kompanyi 2 bari kuvugana, ko izaba ari intambwe ikomeye.
MERGIMS isanzwe itanga uburyo bwo kwishyura ibintu bitandukanye birimo ikarita yo guhamagara, umuriro w’amashanyarazi, amafaranga y’ishuri (tuition fees), ibikoresho by’ikoranabuhanga (electronics), ibiribwa, imiti, n’ibindi, hakoreshejwe urubuga rwayo. Umwaka ushize, MERGIMS yegukanye igihembo mu Rwanda nka sosiyete iteza imbere ubukungu ikoresheje ikoranabuhanga.
.jpg)
Perezida w'u Busuwisi akukirkiye uko iyi mishinga iteye
Muhire asobanura umushinga we
Perezida w'u Busuwisi ageze ijambo kubari bateraniye aho
Umushinga wa Muhire uheruka kwegukana ibihembo 3
.jpg)
Umushinga wa Muhire (ubanza mu bicaye) niwo wonyine wo muri Africa urimo muri 30 yatoranyijwe ku isi hose