Ibi bibaye nyuma y’uko Perezida wa FERWAFA, Shema Ngoga Fabrice, yari yatangaje ko hazatangwa igikombe kimwe gusa, ibintu byakuruye ibitekerezo byinshi mu bakunzi b’umupira w’amaguru mu Rwanda.
Mu itangazo ryashyizwe hanze na Rwanda Premier League, yavuze ko ikipe yo muri Sudani izarangiza iri ku mwanya wa mbere muri BK Pro League izahabwa igikombe cyiswe “BK Pro League Champions 2025/2026”, gusa ntabwo izihabwa ibihembo by’amafaranga bihabwa ikipe yitwaye neza.
RPL kandi yatangaje ko hazanabaho ikindi gikombe kizahabwa ikipe ya mbere mu makipe yo mu Rwanda, kizwi nka “BK Pro League National Champions”, ari na yo izahagararira igihugu muri CAF Champions League ya 2026/2027 ndetse ikanahabwa mliyoni 80 Frw nk'ikipe yahize izindi.
Mu itangazo ryayo, Rwanda Premier League yagize iti: “Shampiyona yacu muri uyu mwaka w’imikino izatangwamo ibikombe bibiri. BK Pro League Champions 2025/2026 ku ikipe yo muri Sudani, ndetse na K Pro League National Champions ku ikipe yo mu Rwanda."
Yakomeje ivuga ko iyi gahunda yashyizweho hagamijwe gukomeza guteza imbere irushanwa no guha agaciro amakipe yose aryitabira, harimo n’ayo muri Sudani ari gukinira mu Rwanda muri uyu mwaka w’imikino.
Al Hilal Omdurman niyo yegukanye igikombe cya Shampiyona ndetse izahabwa igikombe cya BK Pro League Champions 2025/26, mu gihe APR FC isabwa inota rimwe kugira ngo nayo ihabwe BK Pro League National Champions 2025/26.
Rwanda Premier League yemeje ko hazatangwa ibikombe bibiri muri Shampiyona
HABA HABAYEHO KUVUGURUZANYA KWA FERWAFA NA RPL? HAZATANGWA IBIKOMBE BIBIRI, APR NA AL HILAL