Aya masezerano mashya yasinyiwe ku biro bya Rayon Sports ku wa Kane tariki ya 04 Kamena 2026, nyuma y’ibiganiro byabaye hagati ya Perezida wa Rayon Sports, Murenzi Abdallah, n’uyu mutoza wamaze kwigarurira imitima y’abakunzi b’iyi kipe kubera umusaruro udasanzwe yatanze.
Iki cyemezo kije nyuma y’umwaka w’imikino wa 2025/26 waranzwe n’intsinzi zikomeye za Rayon Sports WFC, aho yegukanye ibikombe bine muri bitanu yahataniye. Muri uwo mwaka, Rwaka Claude yayoboye iyi kipe yegukana Igikombe cya Shampiyona y’Abagore (Rwanda Women Super League), Igikombe cy’Amahoro, Igikombe cy’Intwari (Heroes Cup) ndetse na Super Cup.
Uretse ibyo bikombe, Rayon Sports WFC yaninjije amafaranga agera kuri Miliyoni 57 Frw yaturutse mu marushanwa atandukanye yitabiriye ikanegukana intsinzi zikomeye, ibintu byatumye ubuyobozi bw’iyi kipe bumwizera bukomeza kumuha inshingano zo gukomeza kuyobora umushinga wayo.
Mu masezerano mashya, Rwaka Claude azaba afite intego yo gukomeza guteza imbere Rayon Sports WFC no kuyifasha kwitwara neza mu marushanwa Nyafurika, aho abakunzi b’iyi kipe bifuza ko yakomeza gusigasira ibigwi yubatse mu myaka ishize.
Kuva yagera muri Rayon Sports WFC, Rwaka Claude amaze kwegukana ibikombe 10 birimo ibikombe bitatu bya Shampiyona y’Abagore (2023/24, 2024/25 na 2025/26), ibikombe bibiri by’Amahoro (2023/24 na 2025/26), ibikombe bibiri by’Intwari (2024/25 na 2025/26), Super Cup ebyiri (2024/25 na 2025/26) ndetse na Women’s Day Cup 2024/25.
Ibi byose bituma Rwaka Claude akomeza kuba umwe mu batoza bafite ibigwi bikomeye mu mupira w’amaguru w’abagore mu Rwanda, ndetse Rayon Sports WFC ikaba yifuza gukomeza kubakira ku bunararibonye bwe mu rugendo rwo gushaka izindi ntsinzi.
Rwaka Claude amaze kwegukana ibikombe 10 muri Rayon Sports WFC kuva yayigeramo