Iki gitaramo cyiswe “Rumata Show: Ijoro Rya Gakondo Part II”
giteganyijwe ku wa Gatandatu tariki ya 5 Ukuboza 2026, kizabera muri Birmingham
Palace mu Bubiligi, guhera saa mbiri z’ijoro (20:00). Kwinjira bizaba ari
amayero 45.
Ni ku nshuro ya kabiri hateguwe iki gitaramo, cyibanda ku
muziki gakondo, kikaba umwanya wo guhuza Abanyarwanda n’abandi bakunda umuco
w’u Rwanda, binyuze mu ndirimbo n’imbyino byibutsa umwimerere w’Igihugu.
Mu kiganiro na InyaRwanda, Ruti Joël yavuze ko iki ari kimwe
mu bitaramo bimufasha guhura n’abakunzi be baba hanze y’u Rwanda, anatangaza ko
azakoresha uyu mwanya mu kubateguza Album ye nshya yitegura gushyira hanze mu
2027.
Yagize ati: “Ni ibitaramo byanjye ngira hanze y’igihugu
nkahura n’abankunda, mbateguza Album yanjye izasohoka umwaka utaha yitwa
‘Tinya’.”
Uyu muhanzi kandi yatangaje ko ari mu myiteguro irimo no
gufata amashusho y’indirimbo nshya, mbere y’uko yerekeza mu Bubiligi. Icyakora,
avuga ko atarifuza gutangaza byinshi ku byo ateganyiriza abakunzi be, kuko hari
ibindi abateguriye azagenda abereka igihe nikigera.
Yagize ati: “Ndi gukora amwe mu mashusho y’indirimbo nshya
mbere y’uko ngenda. Gusa indirimbo ni agaseke gapfundikiye. Abakunzi banjye
bitege kwishima no kubona utuntu tugiye dutandukanye muri ‘Performance’
yanjye.”
Aya magambo agaragaza ko igitaramo cye kitazaba umwanya wo
kuririmba indirimbo zisanzwe zimaze kumenyekana gusa, ahubwo ko abakunzi be
bashobora no kuzabona ibindi bishya biri mu myiteguro y’ibikorwa bye bya
muzika.
Ruti Joël ni umwe mu bahanzi bagize uruhare mu gukomeza gukundisha abato umuziki gakondo nyarwanda, binyuze mu bihangano bivuga ku rukundo, umuco n’imibereho y’Abanyarwanda.
Mu rugendo rwe rwa muzika, yagiye
ashyira hanze indirimbo zagiye zimufasha kwagura umubare w’abamukurikira, haba
mu Rwanda no hanze yarwo.
Muri Album ye yitwa ‘Musomandera’, yakoze ku bufatanye na
nyakwigendera Yvan Buravan, hakubiyemo indirimbo nka “Igikobwa”, “Cunda”,
“Rumata”, “Nyambo”, “Gaju”, “Akadege” na “Rwagasabo”, n’izindi.
Indirimbo “Rumata” ni imwe mu zamufashije gukomeza
kumenyekana, inaba intandaro yo gukoresha iri zina mu gitaramo ategerejwemo mu
Bubiligi.
Undi mushinga w’indirimbo ze ni Album ‘Rutakisha’, yakoranye
na Clement Guitarist, ikubiyemo indirimbo nka “Rutakisha”, “Mama We”, “African
Girl”, “Umumararungu”, “Dore” na “Mannequin”. Yanakoranye n’abandi bahanzi,
barimo Mike Kayihura mu ndirimbo “Rasana”.
Mu gihe ategura Album nshya ‘Tinya’, igitaramo cyo mu
Bubiligi ni umwe mu myanya azahuriramo n’abakunzi be, akabagezaho umuziki we
ndetse akabaha amakuru y’ibikorwa bye biri imbere.
Ku bakunzi b’umuziki gakondo bazitabira “Rumata Show: Ijoro
Rya Gakondo Part II”, tariki ya 5 Ukuboza 2026 izaba umwanya wo kongera
kwishimira inganzo ya Ruti Joël, mu gihe na we akomeza kwagura ibikorwa bye no
gutegura ibihangano bishya azageza ku bakunzi be mu 2027.
Ruti Joël agiye gutaramira abakunzi be mu Bubiligi mu gitaramo “Rumata Show: Ijoro Rya Gakondo Part II” kizaba ku wa 5 Ukuboza 2026
Ruti Joël yatangaje ko ari gutegura amashusho y’indirimbo nshya mbere yo kwerekeza mu Bubiligi, aho azataramira abakunzi be anabateguza Album ye nshya “Tinya” iteganyijwe mu 2027
“Rumata Show: Ijoro Rya Gakondo Part II” ni igitaramo kizahuza abakunzi b’umuziki gakondo mu Bubiligi, aho Ruti Joël azataramira abacyitabira, akabagezaho inganzo ye
