Ibi yabivugiye mu rukiko rwa Southwark Crown Court i Londres ku wa 28 Ukwakira 2026, aho yireguraga ku byaha birimo gufata abagore ku ngufu n’ihohoterwa rishingiye ku gitsina. Brand w’imyaka 51 ahakana ibyaha birindwi ashinjwa, bivugwa ko byabaye hagati ya 1999 na 2009, bikaba byararezwe n’abagore batandatu.
Yavuze ko filime mbarankuru yasohotse mu 2023 ikubiyemo ibirego bimushinja yagize ingaruka zikomeye ku buzima bwe, agira ati: “Byari ibintu byangizeho ingaruka zikomeye cyane.”
Yongeyeho ko ibirego bimushinjwa byigaruriye ubuzima bwe bwose, kandi ko abantu benshi bari inshuti ze batakimwiyegereza.
Mu rukiko, Brand yahakanye ibirego birimo gufata abagore ku ngufu, kubakorera ibikorwa by’imibonano mpuzabitsina batabyemeye no kugerageza gukururira umwe mu bwiherero. Yemeye ko mu busore bwe yakundaga cyane ibijyanye n’imibonano mpuzabitsina, ariko ahakana ko yaba yarigeze kurenga ku burenganzira bw’abagore.
Ubushinjacyaha bwamubajije niba yari azi ko umuntu avuze oya aba yanze, asubiza ati: “Nzi icyo ijambo oya risobanura.”
Ubushinjacyaha bwamushinje kwibuka gusa ibice by’ibyabaye bimufasha mu kwiregura, cyane cyane nyuma yo kubona ibimenyetso byatanzwe n’abagore bamushinja. Brand yabihakanye, avuga ko yari arimo kugerageza kwibuka neza ibyabaye kera, ariko ko atari ibintu byoroshye.
Mu iburanisha kandi, yabajijwe ku buzima bwe bwo mu myaka ya kera, aho yemeye ko yari yarabaswe no gushaka gukora imibonano mpuzabitsina, ariko ahakana ko yari afite intego yo kuryamana n’abagore 5.000, nk’uko byari byavuzwe n’uwahoze ari inshuti ye akaba n’uwo babanaga, Mark Pinheiro.
Brand yavuze ko atibuka neza niba yarigeze kuvuga ayo magambo, ariko ko bishoboka ko yari amagambo y’urwenya yashoboraga kuvuga afite imyaka 24.
Urukiko rwumvise kandi ko ubukwe bwa Brand n’umuririmbyi Katy Perry mu Ukwakira 2010 bwamuhesheje kwamamara cyane. Mu gihe yabazwaga n’ubushinjacyaha, Brand yanenze itangazamakuru, avuga ko atemeranya n’igitekerezo cy’uko ryamufashe mu buryo buboneye.
Urubanza rurakomeje, kandi Brand aracyafatwa nk’utabihamijwe n’urukiko kugeza igihe hazafatwa umwanzuro wa nyuma.