RSB yasinyanye amasezerano na ASECNA yo kugenzura ubuziranenge bwa serivisi z’indege mu bihugu 18

Kuri uyu wa Gatanu tariki ya 8 Gicurasi 2026, ku biro bya RCI habereye umuhango ukomeye w’isinywa ry’amasezerano y’ubufatanye hagati y’Ikigo cy’u Rwanda gishinzwe Ubuziranenge (RSB) n’Umuryango Mpuzamahanga ushinzwe Umutekano w’Ingendo zo mu Kirere muri Afurika na Madagascar (ASECNA).

Muri aya masezerano, RSB yahawe inshingano zo gusuzuma no guha ASECNA icyemezo cy’ubuziranenge mpuzamahanga (Certification) hagendewe ku kigero cya ISO 9001.

Ibi bivuze ko inzobere z’u Rwanda ari zo zigiye kugenzura niba imikorere y’uyu muryango mugari uhuza ibihugu 18 bya Afurika yujuje ubuziranenge bwemewe ku rwego rw’Isi.

Mu myaka yashize, ibigo by’imbere mu gihugu ni byo byashakaga ibyemezo by’ubuziranenge biturutse hanze. Kuri ubu, u Rwanda rugeze ku rwego rwo gutanga serivisi z’ubuziranenge mu mahanga (Export of Services).

Guhitamo RSB mu bigo byinshi byo muri Afurika n’i Burayi, ni gihamya y’icyizere u Rwanda rumaze kubaka mu bijyanye n’ubuhanga n’ubunyangamugayo mu gukurikirana ubuziranenge.

Umuyobozi Mukuru wa RSB, Raymond Murenzi, yagaragaje ko ubu bufatanye ari ishema ku gihugu, ashimangira ko bije gushimangira intego y’Afurika yo kwishakamo ibisubizo (South-South Cooperation) no guteza imbere Isoko Rusange rya Afurika (AfCFTA).

Yavuze kandi ko icyo bazibandaho mu gukora mu gihe cy’imyaka itatu basinyanye na ASECNA ari uguha serivisi ibihugu 18 bikorana na ASECNA mu kugenzura ubuziranenge bw’ibyo bakora.

Yagize ati: “Icyo tugiye gukora ni uguha iyo serivsi (Kugenzura ubuziranenge bw’ibikorwa bya ASECNA) ibi bihugu byose 18 twavuze hirya no hino muri Afurika bikazadufasha kongera ubushobozi cyane cyane abakora izo serivisi.”

Ibindi bizakorwa yakomeje avuga ni “Ugukoresha inzobere zacu z’u Rwanda kujya kureba no kugenzura niba koko amabwiriza y’ubuziranenge twavuze yubahirizwa muri ibyo bihugu 18 cyane cyane muri izo serivisi za ASECNA, tugahera cyane cyane kubyo banditse bakora, servisi baha ababagana muri ibyo bibuga by’indege.”

Yavuze ko mbere yo gusinya aya masezerano babanje kureba ubumenyi abakozi ba RSB bafite, ibikoresho bafite, basanga babyujuje ku buryo babasha gukora imirimo yabo neza mu bihugu bikorana na ASECNA hanyuma bemera gusinya ayo masezerano.

Umuyobozi wa ASECNA, Prosper Zo’o Minto’o yashimiye RSB kubwo amasezerano bagiranye ndetse avuga ko yizeye y’uko aya masezerano azagira umusaruro ufatika kandi ukomeye.

Minisitiri w’ubucuruzi n’inganda, Prudence Sebahizi yavuze ko bishimiye amasezerano ASECNA yagiranye na RSB kandi ko bizeye ko azatanga umusaruro ku buryo n’ibindi bigo bikomeye bizagana u Rwanda ndetse ko bigaragaza ko inganda zo mu Rwanda zikora ibintu byujuje ubuziranenge.

ISO 9001 ni icyemezo mpuzamahanga gihabwa ikigo cyagaragaje ko gifite "Uburyo bunoze bwo kuyobora no gucunga ireme ry’imirimo" (Quality Management System - QMS).

Ntabwo ari icyemezo cy’igicuruzwa kimwe (nk’isabune cyangwa ifarini), ahubwo ni icyemezo cy’uko inzira zose zikoreshwa mu kigo (guhera ku mutekano, serivisi abakiriya bahabwa, kugeza ku buyobozi) zikorwa mu buryo budahushanya kandi buhora bwivugurura.

RSB igiye gukorana na ASECNA mu gihe cy’imyaka itatu iri imbere ishobora no kuzongerwa hashingiwe ku bizagerwaho muri ayo masezerano aho RSB izajya igenzura ubuziranenge bw’ibibuga 21 n’amashuri 3 yifashishishwa mu guha amahurwa abakozi (Ahantu 24 mu bihugu 18 byo muri Afurika).

RSB na ASECNA basinyanye amasezerano yo kugenzura ubuziranenge bwa serivisi z'indege mu bihugu 18

Minisitiri w'ubucuruzi n'inganda, umuyobozi wa RCI n'abandi bayobozi batandukanye bitabiriye uyu muhango wo gusinyana amasezerano hagati ya RSB na ASECNA

Umuyobozi wa RSB yavuze ko ari intambwe nziza u Rwanda ruteye yo kuba igiye kujya itanga izi serivisi z'ubuziranenge mu bihugu 18 

Umuyobozi wa ASECNA yavuze ko bizeye ko aya masezerano azagira umumaro ku mpande zombi

AMAFOTO: Dox Visual