Amakuru yizewe yageze ku InyaRwanda
agaragaza ko Ross Kana yahagurutse ku Kibuga Mpuzamahanga cy’Indege cya Kigali
i Kanombe, mu gitondo cyo ku Cyumweru tariki 22 Kamena 2025, ahagana saa yine
za mu gitondo.
Uyu muhanzi wamenyekanye cyane binyuze mu
ndirimbo ye yise ‘Mami’, arateganya gukorera iyi ndirimbo nshya mu buryo
bugezweho, aho azifashisha bamwe mu bakobwa batoranyijwe n’inzu z’imideli
zikorera muri Mombasa.
Ross Kana yagiye ari kumwe n’itsinda
rimufasha mu bijyanye no gufata amashusho, rigizwe n’abahanga mu bijyanye
n’amashusho no kuyatunganya. Biteganyijwe ko iyi ndirimbo izakorwa ku ngengo
y’imari irenga $16,000, ikaba iri mu zihenze kurusha izindi amaze gukora,
uretse ‘Mami’ yigeze kumusaba akayabo karenzeho gato.
Iyi ndirimbo izaba ari umushinga wa mbere
Ross Kana akoranye n’ikipe ye nshya kuva yatandukana n’inzu ifasha abahanzi ya
1:55 AM, nubwo hatarashyirwa umukono ku masezerano yemeza itandukana ryabo ku
mugaragaro.
Amakuru y’imbere muri 1:55 AM agaragaza ko
impamvu nyamukuru yatumye impande zombi zitandukana ari uko Ross Kana yatangiye
gushora amafaranga menshi mu bikorwa bye, ibintu iyi nzu itari yiteguye
gukomeza gutera inkunga, bityo biganisha ku gutandukana kwabo.
Kuki
abahanzi benshi basigaye bajya gukorera indirimbo i Mombasa?
Mombasa ni umwe mu mijyi y’ubukerarugendo
izwi cyane muri Afurika y’Iburasirazuba. Ni umujyi uri ku nkombe z’inyanja
y’Abahinde (Indian Ocean), ufite imiterere idasanzwe irimo.
Hari za Hoteli z’akataraboneka zicyeye n’inyubako zigezweho. Hari imbuga ndangamuco
n’ahantu ndangamateka nk’ahitwa Fort Jesus hafite akarusho ku mashusho
y’indirimbo zifite insanganyamatsiko z’ubutore cyangwa iz’urukundo.
Hari imiterere y’ikirere ihoraho, cyane
cyane ubushyuhe n’izuba ryiza rituma gufata amashusho biboneka neza kandi
bigasaba imbaraga nke mu kuyatunganya.
Inyanja n’inkombe z’umucanga w’umweru
bikurura abahanzi bashaka amashusho ya “luxury” cyangwa y’urukundo.
Aba bahanzi kandi bahakururirwa n’uko
ikiguzi cy’ibikorwa bitandukanye kiringaniza: ushobora kubona imodoka
zigezweho, ababyinnyi b’umwuga, ndetse n’abatunganya amashusho bafite
ibikoresho bigezweho ku giciro kidahanitse ugereranyije n’ahandi.
Kubera ko Mombasa isurwa n’abanyamahanga
benshi, kuyikoramo amashusho y’indirimbo bituma igera kuri benshi mu buryo
bwihuse, byaba ku mbuga nkoranyambaga cyangwa kuri YouTube.
Ni umujyi wafashije abahanzi nka Otile
Brown, Tanasha Donna, na Sauti Sol gutangira imishinga mpuzamahanga ku rwego
rw’amashusho.
Ross Kana, uri mu rugendo rwo
kwimenyekanisha no kugendera ku murongo mpuzamahanga, ni yo mpamvu yahisemo
Mombasa nk’ahantu ho gutangiriza iyi ndirimbo nshya yitezweho byinshi.
Agiye gukora iyi ndirimbo, nyuma y’iminsi 51 ishize abaye umuhanzi wigenga, kuko yamaze gutandukana na 1:55 AM. Yasezeye ku wa 3 Gicurasi 2025, yifashishije konti ye ya Instagram, agaragaza ko yatandukanye n’iriya sosiyete nyuma y’umwaka n’amezi bakorana.
Ross Kana yerekeje i Mombasa muri Kenya mu
rugendo rugamije kuhakorera indirimbo
Ross Kana amaze iminsi 51 abaye umuhanzi
wigenga nyuma yo gutandukana na 1:55 AM
KANDA HANO UREBE AMASHUSHO Y’INDIRIMBO ‘MAMI’
YA ROSS KANA