Uyu mukinnyi w’imyaka 41
asigaje ibitego 18 gusa kugira ngo agere ku ntego yihaye yo gutsinda ibitego
1,000 mu mikino yemewe, ikintu cyaba amateka akomeye mu mupira w’amaguru.
Ronaldo yatsinze igitego
cya kabiri cya Al Nassr, ku mupira yahawe na João Félix. Al Hamdan na Angelo na
bo batsindiye iyi kipe yo muri Saudi Arabia, mu gihe Bongonda ari we watsindiye
Al Faysaly igitego cy’impozamarira.
Iki gitego cyatumye Ronaldo agira ibitego bitandatu amaze gutsinda muri uyu mwaka w’imikino, birimo bitanu yatsinze muri shampiyona ya Saudi Arabia n’ikindi kimwe cyo muri AFC Champions League.
Imibare igaragaza ko mu
bitego 982 Ronaldo amaze gutsinda mu mikino yemewe, 836 yabitsinze mu makipe asanzwe,
mu mikino 1,109, mu gihe ibitego 146 yabitsinze mu mikino 234 amaze gukinira
ikipe y’igihugu ya Portugal.
Mu makipe yakiniye, Real
Madrid ni yo yatsindiye ibitego byinshi, kuko yayitsindiye 450. Manchester
United yayitsindiye ibitego 145, Juventus ayitsindira 101, Sporting CP
ayitsindira 5, naho Al Nassr ayitsindira
135.
Ronaldo akomeje kwandika amateka mu mupira w’amaguru, mu gihe urugendo rwe rwo kugera ku bitego 1,000 rukomeje gukurikirwa n’abakunzi b’uyu mukino hirya no hino ku Isi.
